Wezîrê Berevaniyê yê Îtalyayê serdana Hewlêrê dike

Navenda Nûçeyan (K24) – Wezîrê Berevaniyê yê Îtalya digihe Hewlêrê û serdana hêzên leşkerî yên welatê xwe yên li Herêma Kurdistanê dike.

Wezîrê Berevaniyê yê Îtalyayê Guido Crozeto îro 21ê Berçile bi serdaneke fermî serdana Herêma Kurdistanê dike û ji aliyê Wezîrê Pêşmerge Şoreş Îsmaîl ve pêşwazî dê lê were kirin.

Wezareta Pêşmerge di daxuyaniyekê de ragihand, Wezîrê Berevaniyê yê Îtalya dê serdana hêz, şêwirmendên leşkerî û konsulxaneya Îtalyayê li Herêma Kurdistanê bike.

Da zanîn jî, Wezîrê Berevaniyê yê Îtalyayê dê çendîn hevdîtinan ligel berpirsên pilebilind ên Herêma Kurdistanê pêk bîne.

Herî dawî, Wezîrê Berevaniyê yê Îtalyayê roja 2ê Gulana 2023an serdana Herêma Kurdistanê kiribû û ligel Serokê Herêma Kurdistanê Nêçîrvan Barzanî û Serokwezîr Mesrûr Barzanî civiyabû.

Îtalya endama Hevpeymaniya Navdewletî ya li dijî DAIŞê ye û hejmarek şêwirmendên wê yên leşkerî li Herêma Kurdistanê û Iraqê hene û Pêşmerge û leşkerên Iraqê perwerde dikin.