مەسرور بارزانی پێشوازی لە باڵيۆزى نه‌رويج له ئوردن و عێراق کرد
K24 - هەولێر
سەرۆکوەزیرانی هەرێمی کوردستان پێشوازی لە باڵيۆزى نه‌رويج له ئوردن و عێراق کرد و، بە پێویستیش دەزانێت، کۆمەڵگەی نێودەوڵەتی ڕۆڵی گرنگ و کارای خۆی لە پاراستنی ئاسایشی هەرێمی کوردستان و دابینکردنی مافە دەستوورییەکانی بگێڕێت.
ئه‌مڕۆ چوارشه‌ممه، 31-01-2024، مەسرور بارزانى، سه‌رۆكى حکومەتی هه‌رێمى كوردستان، پێشوازى له ئيسپن ليندباك، باڵيۆزى نه‌رويج له ئوردن و عێراق كرد.
بە گوێرەی راگەیەندراوێکی حکومەتی هه‌رێمى كوردستان؛ لە دیدارەکەدا پەرەپێدانی پەیوەندیی دوولایەنە و دوایین پەرەسەندنەکانی عێراق و ناوچەکە تاووتوێ کرا.
ئاماژە بەوەش کراوە، "باڵیۆزی نەرویج نیگەرانی بەرانبەر هێرشی ئەم دواییەی سەر هەولێر دەربڕی و هاوخەمیى خۆی بۆ کەسوکاری قوربانییانی هێرشەکە بە سەرۆکی حکومەت گەیاند و پشتیوانیی وڵاتەکەی بۆ ئارامی و سەقامگیریی هەرێمی کوردستان دووپاتکردەوە. هاوکات سەرسامیى خۆيشی بە خۆڕاگری و هاوهەڵوێستیى گەلی کوردستان بەرانبەر ئەو هێرشە ناڕەوایەی کرایە سەر هەولێر نیشاندا".
سەرۆکی حکومەت سوپاسی پشتیوانی و هاوسۆزیى نەرویجی کرد و جەختی کردەوە کە پێویستە کۆمەڵگەی نێودەوڵەتی ڕۆڵی گرنگ و کارای خۆی لە پاراستنی ئاسایشی هەرێمی کوردستان و دابینکردنی مافە دەستوورییەکانی بگێڕێت.