کونسوڵی شانشینی ئوردن: مەسرور بارزانی پێشکەوتنی لە هەموو کەرتەکانی هەرێمی کوردستان بەدەست هێناوە

K24- هەولێر

کونسوڵی گشتی شانشینی ئوردنی، ستایشی مەسرور بارزانی، سەرۆکی حکوومەتی کوردستان دەکات لە پەرەپێدانی پەیوەندییەکانی نێوان هەرێمی کوردستان و ئوردنی هاشمی، داواشی لە قوتابیانی کوردستان کرد بۆ درێژەدان بە خوێندن بچنە ئوردن .

ئەمڕۆ یەک شەممە(5 ی ئایاری 2024)، لە چوارچێوەی دیداری خوێندنی باڵای ئوردنی- کوردستانی کە بە ئامادەبوونی مەسرور بارزانی، سەرۆکی حکوومەتی هەرێمی کوردستان لە هەولێر دەستی بەکارەکانی کرد، فوئاد مەجالی، کونسوڵی شانشینی ئوردن، سوپاسی سەرۆک وەزیران مەسرور بارزانی کرد لە پەرەپێدانی پەیوەندییەکانی نێوان هەرێمی کوردستان و ئوردنی هاشمی.

فوئاد مەجالی، لە گوتەکەیدا گوتی: ئەمڕۆ ڕووداوێکی زانستیی گرنگ بەڕێوە دەچێت، ئەمڕۆ دیداری خۆشەویستی و برایەتیە، لە هەماهەنگی لە بواری خوێندنی باڵادا.

کونسوڵی گشتیی شانشینی ئوردن، لە گوتەکەیدا تیشکی خستە سەر ئەوەی، خوێندن لە ئوردن پێشکەوتووە، گوتیشی: ئەمڕۆ بە پاڵپشتی سەرۆک وەزیرانی کوردستان مەسرور بارزانی و، حکوومەتی ئوردن ئەم دیدارە دەکەین، هیوای خواست قوتابیانی کوردستان لە ئوردن درێژە بە خوێندن بدەن، لەگەڵ ئەوەشدا سوپاسی هەموو ئەوانەی کرد کە پاڵپشتی سازکردنی دیدارەکەیان کردووە.

لە کۆتایی قسەکانیشیدا، کونسوڵی شانشینی ئوردن، ستایشی مەسرور بارزانی،سەرۆکی حکوومەتی هەرێمی کوردستانی کرد کە لە سەرجەم کەرتەکان پێشکەوتنی زۆری وەدەست هێناوە.