هاتووچۆی هەولێر: وێنە و پۆستەری کاندیدەکان بەستونەکانی ترافیک لایت و هێماکانی هاتووچۆ هەڵنەواسن

هاتوچۆی هەولێر ڕایدەگەیەنێت: لیست و ڕەوت و لایەنەکان، وێنە و پۆستەری کاندیدەکان بەستونەکانی ترافیک لایت و هێماکانی هاتووچۆ هەڵنەواسن.

سێشەممە 24ـی ئەیلوولی 2024، بەڕێوەبەرایەتی هاتوچۆی هەولێر ڕاگەیەندراوێکی لەبارەی دەستپێکردنی بانگەشەی هەڵبژاردن بڵاو کردووەتەوە و داوا لە لیست و ڕەوت و لایەنەکان دەکات، وێنە و پۆستەری کاندیدەکان بەستونەکانی ترافیک لایت و هێماکانی هاتووچۆ هەڵنەواسن.

هاتوچۆی هەولێر لە ڕاگەیەندراوەکەدا دەڵێت: بەهۆی دەست پێکردنی وادەی بانگەشەی هەڵبژاردنی پەرلەمانی کوردستان ، داوا لەسەرجەم لیست و ڕەوت و لایەن و کاندیدە بەڕێزەکانی بەشدار لەهەڵبژاردن دەکەین کە، لەماوەی  ڕێگەپێدراو بۆ بانگەشەکردن، وێنە و پۆستەری کاندیدەکان و بڵاو کراوەکانیان بەستونەکانی ترافیک لایت و هێماکانی هاتووچۆ هەڵنەواسن و وێنەی گەورە لەنزیک سوڕانەوەکان و سەر شۆستەی چوار ڕییانەکان دانەنێن کەببێتە هۆکاری بەربەستی بینین لەبەردەم شوفێران.

بەڕێوەبەرایەتی هاتوچۆی هەولێر دەڵێت: جامی ئۆتۆمبێل و ژمارەی تابلۆ بە ئاڵا و لۆگۆ و وێنەی کاندیدەکان دانەپۆشن،  داوا لە  بانگەشە کاران دەکەین لەدواوەی ئۆتۆمبێلی بارهەڵگر سەرنەکەون و جەستەیان لەجام و سلایدی ئۆتۆمبێلەکان نەهێننەدەرەوە ، ڕێگاو شەقامەگشتیەکان نەگرن  لەپێناو دروست نەبوونی جەنجاڵی هاتووچۆ و پاراستن و سەلامەتی گیانیان و ڕونەدانی ڕووداوی هاتووچۆی نەخوازراو، دەشڵێت: دەخوازین وادەی بانگەشە کە لە کەشێکی هێمن و دیموکراسی  تەواو ببێت دوور لە سەرپێچی یاسا و ڕێنمایەکانی هاتووچۆ.

ڕۆژی 25ـی ئەیلوولی 2024 بانگەشەی هەڵبژاردن دەست پێدەکات تاوەکو 15ـی تشرینی یەکەمی ئەم ساڵ بەردەوام دەبێت، هەروەها هەڵبژاردنی پەرلەمانی کوردستان 20ـی تشرینی یەکەمی ئەم ساڵ بەڕێوە دەچێت و ئەنجوومەنی کۆمیسیارانی کۆمیسیۆنی سەربەخۆی هەڵبژاردنەکانی عێراق لیستی ناوی کاندیدانی پەسەند کرد کە ژمارەیان 1191 کەسە.