عەبدوڵلا شێرکاوەیی: نموونەی پێکەوەژیانی کوردستان بە ناوەندەکانی ئەمەریکا دەگەیەنین
گوتەبێژی یەکێتیی زانایانی ئاینی ئیسلامیی کوردستان، کە ئەندامێکی شاندی بۆردی باڵای وتاربێژانی هەرێمی کوردستانە بۆ ویلایەتە یەکگرتووەکانی ئەمەریکا دەڵێت: لە ئەمەریکا سەردانی ناوەندە ئەکادیمی و ئاینییەکان دەکەین و نموونەی پێکەوەژیانی کوردستانیان نیشان دەدەین.
د.عەبدوڵلا شێرکاوەیی، گوتەبێژی یەکێتیی زانایانی ئاینی ئیسلامیی کوردستان بە ماڵپەڕی کوردستان24ـی ڕاگەیاند: شاندێکی مامۆستایانی ئایینی کە پێکهاتوون لە بەشێکی ئەندامانی بۆردی باڵای وتاری هەینی لە وەزارەتی ئەوقاف و کاروباری ئایینی و بەرپرسانی بۆردی پارێزگاکان ئێستە لە ئەمەریکان، لە هەردوو ویلایەتی واشنتن و کالیفۆرنیا سەردانی چەندین ناوەند و دەزگای ئەکادیمی و ئایینی و فەرهەنگی دەکەین بۆ زیاتر تێگەیشتن لە پرسی پێکەوەژیانی ئایینی و یەکتر قەبوڵکردن و ڕێزگرتن لە بەها مرۆییەکان، لەگەڵ پەرەدان بە خاڵە هاوبەشەکان، بۆ ئەوەی بتوانین بەرەنگاریی هەندێک لەو پێشهات وئالەنگارییانە ببینەوە کە ڕووبەڕووی مرۆڤایەتی و کۆمەڵگەکان بوونەتەوە.
د.عەبدوڵلا شێرکاوەیی دەڵێت: ئامانجێکی دیکەی ئەو سەردانەی بۆردی باڵای وتاربێژانی هەرێمی کوردستان بۆ ویلایەتە یەگرتووەکانی ئەمەریکا، بەشدارییە لە پرۆژەی بەرەنگاریی بیریی توندڕەوییە لەسەر ئاستی وڵاتان، بۆ ئەوەی نەخشەڕێگەیەک دابندرێت بۆ چارە و نەهێشتنی بیری توندڕەوی. هاوکات، ڕۆڵی مامۆستایانی ئایینی و ناوەندە ئەکادیمییەکان بۆ ئەوەی هاوبەش بن لە کەمکردنەوەی ئەو بیرە توندڕەوییە و بڵاوکردنەوەی پەیامی ئاشتی و پێکەوە ژیان و یەکتر قەبوڵکردن، هەروەها داکۆکی کردن لە مافی مرۆڤ.
ئەو مامۆستا ئایینیە دەڵێت: بەرنامەمان هەیە سەردانی چەند ناوەندێک بکەین لە ئەمەریکا، لەوانە چەند سەنتەرێکی توێژینەوەی ئەکادیمی و چەند مزگەوتێک و ناوەندێکی ئایینی و چەند کەسایەتییەک و ناوەندە فەرمییەکانیش، دەمانەوێت پەیامی کورد بدەینە ئەو ناوەندە گرنگانەی ئەمەریکا بۆ خزمەتکردنی کوردستان.
دەشڵێت: ئەو پەیوەندییانە بۆ ئێمە مامۆستایانی ئایینی گرنگە بۆ ئەوەی نموونەی ئەو پێکەوە ژیانەی لە کوردستان هەیە، بەتایبەت ئەو وڵاتانەی کە لێمانەوە دوورن، هیوادارین دەنگی مامۆستا و زانایانی ئایینی کوردستان بین لەو وڵاتە.
سێشەممە 24ـی ئەیلوولی 2024، کونسوڵخانەی گشتی ئەمەریکا بڵاوی کردەوە، ستیڤ بیتنەر کونسوڵی گشتی ویلایەتە یەگرتووەکانی ئەمەریکا لە هەرێمی کوردستان لەگەڵ گروپێک لە پێش نوێژ و گوتارخوێنانی ئایینی هەرێمی کوردستان کۆبووەوە کە بۆ بەشداریکردن لە پرۆگرامێکی ئاڵوگۆڕی کەلتووری گەشت بۆ ویلایەتە یەکگرتووەکانی ئەمەریکا دەکەن. کونسوڵخانەی گشتی ئەمەریکا ڕایدەگەیەنێت: لەمیانەی پڕۆگرامەکەدا، مامۆستایانی ئایینی بە مەبەستی ئاشنابوونی زیاتر بە لێبووردەیی ئایینی و ڕۆڵی سەرکردە ئایینییەکان لە ڕووبەڕووبوونەوەی توندڕەوەیدا، سەردانی نووسینگەکانی حکوومەت و ڕێکخراوە ناحکوومییەکان و دەزگا ئایینییەکان لە ویلایەتە یەگرتووەکانی ئەمەریکا دەکەن، کونسوڵخانەکە دەشڵێت: شاندەکە بۆ دروستکردنی تۆڕی پەیوەندی، سەردانی جڤاتی ئایینە جیاوازەکان دەکەن.