دوو مووشەک ئاراستەی باڵیۆزخانەی ئەمەریکا لە بەغدا کران

K24 – هه‌ولێر:

دوو مووشەكی جۆری کاتیۆشا لە نزیك باڵیۆزخانەی ئەمەریكا و مووشەكێكیش لە نزیك رووباری دیجلە لە بەغدا كەوتنە خوارەوە.

ئاژانسی ھەواڵی فرانس پرێس لە زاری سەرچاوەیەكی ئەمنی عێراقییەوە بڵاوی كردووەتەوە، دوو مووشەكی كاتیۆشا، یەكێكیان لە نزیك باڵیۆزخانەی ئەمەریكا و یەكێكیشیان لە نێو ناوچەی سەوز كەوتوونەتە خوارەوە. ئاماژەی بەوەش كرد، مووشەكی سێیەم لە نزیك ناوچەی سەوز و لە دەورووبەری رووباری دیجلە کەوتووەتە خوارەوە.

وا بڵاوكراوەتەوە لە لەنێو باڵیۆزخانەی ئەمەریكا زەنگی ئاگاداركردنەوە لێدراوە و كارمەندان خراونەتە حاڵەتی ئامادەباشییەوە بۆ ئەگەری نزیكبوونەوەی ئەو مووشەكانە.

تا ئێستا ھیچ لایەنیك بەرپرسیاریەتی خۆی لە ئاراستەكردنی ئەو مووشەكانە رانەگەیاندووە و شانەی راگەیاندنی جەنگی عێراقیش، كەوتنەخوارەوەی ئەو مووشەكانەی پشتڕاست كردووەتەوە، بەڵام هیچ زانیارییەکی ئاشکرا نەکردووە.

ئاراستەکردنی ئەو مووشەکانە لە کاتێکدایە، چەند رۆژێکە بۆردومان کردنی سەربازگەکانی حەشدی شەعبی دەستیپێکردووەتەوە.

H.J