شێروان شەمێرانی: چوارچێوەی هەماهەنگی، لەترسی لە دەستدانی دەسەڵات سزای هەرێمی کوردستان دەدات

شرۆڤەکارێکی سیاسی ڕایگەیاند، چوارچێوەی هەماهەنگی ترسی لە دەستدانی دەسەڵاتییان هەیە لە هەڵبژاردنی داهاتوو، بۆیە بە هەموو جۆرێک هەوڵ دەدات سزای هەرێمی کوردستان بدات.

ئەمڕۆ شەممە، 7ـی حوزەیرانی 2025، شێروان شەمێرانی، شرۆڤەکاری سیاسی  بە کوردستان24ـی ڕاگەیاند "هەرێمی کوردستان هەڵناوەشێتەوە و هەرێمێکی دەستوورییە و پارێزبەندییەکی نێودەوڵەتیشی هەیە، لەبەر ئەوە هەڵوەشاندنەوەی هەرێمی کوردستان ناکرێت، ئەمە بابەتێکە تەنانەت دادگای فیدراڵیش ناتوانێت بیکات."

ئەو شرۆڤەکارە دەڵێت: کە دەڵێین عێراق واتە چوارچێوەی هەماهەنگیی شیعەکان، بە ڕاشکاوانە دەڵێن؛ هەرێمی کوردستان لەسەر هەمان سیاسەتی خۆی دەڕوات دەبێت جارێکی دیکە سزا بدرێتەوە. ئەوان لەم هەنگاوەیان دەیانەوێت جارێکی دیکە بیبەنەوە ماڵی گوێڕایەڵی (بیت الطاعة) ،  دەیانەوێت بزانن ئەوەی هەرێمی کوردستان لە ماوەی ئەم چوار ساڵەی ڕابردوو ئەو سیاسەتە نێودەوڵەتییەی گرتوویەتییەبەر، کە بە ئاڕاستەیەک دەڕوات خەریکە دەبێتە جێگرەوەی عێراق. 

دەشڵێت: لە زۆر شوێنی ئەورووپا و ئەمەریکادا پێویستیان بە عێراق نەماوە، چونکە هەرێمی کوردستان جێگای عێراقی گرتووەتەوە و ئەو بۆشاییە نێودەوڵەتییە و بۆشایی ڕۆژهەڵاتی ناوەڕاستیشی پڕکردووەتەوە.

ئاماژەی بەوەش دا، ئەگەر وەکو کوردستان و نەتەوەی کورد بیر بکەینەوە، ئەوا ئەوەی هەرێمی کوردستان دەیکات دروستە. ئێمە دەمانەوێت لەو گرفتە تێبگەین، حکوومەتی عێراق بۆ وادەکات و بیانووی چییە، هۆکارەکەش دیارە کە بۆ وادەکات، سیاسییەکانی هەرێمی کوردستان بە ئۆپۆزسیۆن و دەسەڵاتەوە دەزانن و تێگەیشتوون لەوەی بەغدا چی دەوێت، بەڵام گرنگ ئەوەیە چۆن وەڵامی دەدرێتەوە و چۆن مامەڵەی لەگەڵ دەکرێت، لێرەدا ئەوەی گرنگە بزانیت چەند یارمەتی هەرێمایەتی و نێودەوڵەتیت هەیە بۆ ئەوەی مامەڵەی لەگەڵدا بکەیت.

باسی لەوەش کرد، ئێمە گەیشتینە ئاستی ڕیفراندۆم، بەڵام هیچ پاڵپشتییەکی هەرێمایەتی و نێودەوڵەتیمان نەبوو، ئێستا ئەو پاڵپشتییە هەیە، بەڵام لە چوارچێوەی عێراقە، ئەگەر لە ڕووی یاساییەوە مامەڵە لەگەڵ ئەم هەنگاوەدا بکەی، یاسا دروستەکە بریتییە لە دەرکردنی یاسای نەوت و گاز، شیعەش نایەوێت ئەم یاسایە دەرچێت، نە ئێستا نە چەندان ساڵی دیکە.

شێروان سەمێرانی، ڕاشیگەیاند "محەممەد شیاع سوودانی، سەرۆک وەزیرانی عێراق لە یەکێک لە کارنامەکانی شەرعییەتی پەرلەمانی وەرگرت و بوو بە سەرۆکی حکوومەتی عێراق، کارنامەیەکی دیکە بریتیبوو لە؛ دەرکردنی یاسای نەوت و گاز، تا ئێستا جیبەجێ نەکراوە، هیچ پەرلەمانتارێکی کورد و دەسەڵاتداری کوردیش تاکوو ئیستا لێیان نەپرسیوەتەوە، ئەگەر بێت و ئەو یاسایە تێپەڕێنرێت چارەی گرفتی نێوان هەرێم و بەغدا دەکرێت و دەتوانین سەربەخۆی کوردستانیش لەو ڕێگەوە بەدەست بێنین."