نوێنەری زەردەشتییەکان لە عێراق سوپاسی سەرۆک بارزانی دەکات
نوێنەری زەردەشتییەکان لە عێراق دەڵێت: سوپاس و پێزانینمان بۆ سەرۆك بارزانی هەیە بۆ ئەو هەڵوێستانەی کە پشتیوانی لە فرەپێکهاتەیی و ئازادی پێکهاتەکان کردووە.
حەیدەر عسفور، نوێنەری زەردەشتییەکان لە عێراق، لە کۆبوونەوەیەکی نەتەوە یەکگرتووەکان لە جنێڤ ڕایگەیاند: سوپاسی حکوومەتی هەرێمی کوردستان و عێراق دەکەین بۆ هەوڵەکانیان لە پشتیوانیکردن لە پێکهاتەکان و هەنگاوەکان بۆ پتەوکردنی سەقامگیری و پێکەوەژیان.
دەشڵێت: سوپاسێکی تایبەتمان بۆ سەرۆك مەسعود بارزانی هەیە و پێزانینمان بۆ هەڵوێستەکانی هەیە کە پشتیوانی لە فرەپێکهاتە، ئازادییەکان و مسۆگەرکردنی شکۆمەندی هەموو پێکهاتەکان کردووە.
سەرۆک مەسعود بارزانی هەمیشە بە پارێزەری سەرسەختی مافی پێکهاتەکان (تورکمان، کلدان، سریان، ئاشووری، ئەرمەن و ئێزیدی) ناسراوە و باوەڕێکی قووڵی بە "پێکەوەژیان" هەیە.
هەروەها لە کاتی نووسینەوەی دەستووری عێراقیش، سەرۆک بارزانی پێداگری کرد لەسەر چەسپاندنی مافی نەتەوە و ئایینە جیاوازەکان. تەنانەت لە سەردەمی شۆڕشیشدا، هەمیشە جەختی لەوە کردووەتەوە کە کوردستان هی هەمووانە بەبێ جیاوازی ئایینی و نەتەوەیی.
لە کاتی هێرشەکانی تیرۆریستانی داعش، بە تایبەت بۆ سەر ناوچەکانی کریستیانەکان و خوشک و برا ئێزیدییەکان، سەرۆک بارزانی دەرگای کوردستانی بە ڕوویان کردەوە و فەرمانی کرد کە دەبێت بەوپەڕی ڕێزەوە مامەڵەیان لەگەڵدا بکرێت.
لای سەرۆک بارزانی پاراستنی مافی پێکهاتەکان تاکتیکێکی سیاسی نییە، بەڵکوو پرەنسیپێکی نەگۆڕە و پێی وایە جوانیی کوردستان لەو فرەیی و پێکەوەژیانەدایە.
