هێمن لهۆنی: وەبەرهێنەرانی کورد و هاوتا جیهانییەکانیان بۆ بازرگانی و ئابووریی پەیوەندی دروست دەکەن
هێمن لهۆنی، سەرپەرشتیاری ماڵی کوردستان لە داڤۆس بە کوردستان24ـی ڕاگەیاند، بۆ سێیەمین ساڵی یەک لەدوای یەک مەسرور بارزانی، سەرۆکوەزیرانی هەرێمی کوردستان بە یاوەریی شاندێکی باڵا و 20 سەرمایەداری نیشتمانی، بەشداری لە کۆڕبەندی ئابووریی جیهانی دەکات.
ئەم ئامادەبوونە بەشێکە لە ستراتیژیی حکوومەتی هەرێم بۆ ناساندنی دەرفەتە ئابوورییەکانی کوردستان لە یەکێک لە گرنگترین ناوەندە دارایی و سیاسییەکانی جیهان.
سەرپەرشتیاری ماڵی کوردستان تیشکی خستە سەر ئەوەی کە ئەمساڵ کۆڕبەندی داڤۆس بە ئامادەبوونی سەرۆکی ئەمریکا و ژمارەیەکی زۆرتر لە شاند و نوێنەرایەتیی وڵاتان، بە بەراورد بە ساڵانی ڕابردوو گەورەتر و بەرفراوانتر بەڕێوە دەچێت، ئاماژەی بەوەش کرد کە چاوەڕوان دەکرێت ئەم خولەی کۆڕبەندەکە ببێتە مەیدانێکی گرنگ بۆ ئەنجامدانی چالاکیی جۆراوجۆر و کۆبوونەوەی دوو قۆڵی لە نێوان وەبەرهێنەرانی کورد و هاوتا جیهانییەکانیان، بە ئامانجی دروستکردنی پەیوەندیی بازرگانی و ئابووریی نوێ.
لەبارەی دەرفەتەکانی ئەمساڵ، لهۆنی ڕوونیکردەوە، بەرزبوونەوەی ئاستی بەشداریی وڵاتان و کۆمپانیا گەورەکان نیشانەی ئەوەیە دەرفەتی زۆرتر و باشتر بۆ وەبەرهێنان و بزنس بۆ هەرێمی کوردستان دەڕەخسێت،ماڵی کوردستان لە داڤۆس وەک سەکۆیەک کار دەکات بۆ ئەوەی وەبەرهێنەرانی جیهان لە نزیکەوە ئاشنای ژینگەی کارکردن و ئەو ئاسانکارییە یاسایی و کارگێڕییانە بن کە حکومەتی هەرێمی کوردستان بۆ سەرمایەی ناوخۆیی و بیانی دابینی دەکات.
پڕۆژەی ماڵی کوردستان لە داڤۆس، کە لە چەند ساڵی ڕابردوودا بە دەسپێشخەریی سەرۆکوەزیران مەسرور بارزانی دامەزراوە، بووەتە ناوەندێکی گرنگی دیپلۆماسی و ئابووری بۆ نوێنەرایەتیکردنی کەرتی تایبەت و گشتیی هەرێمی کوردستان، ئەم ناوەندە ساڵانە لە پەراوێزی کۆڕبەندەکەدا، دەبێتە شوێنی کۆبوونەوە ئاستبەرزەکان و تاوتوێکردنی پڕۆژە ستراتیژییەکان، کە ڕاستەوخۆ کار دەکات بۆ ڕاکێشانی سەرمایەی بیانی بۆ ناوخۆی هەرێمی کوردستان.