ئەنجوومەنی وەزیران بۆ فراکسیۆنە کوردستانییەکان: رێگە مەدەن ئەنجامی سەرژمێری بشێوێندرێت

ئەنجوومەنی وەزیران، دەستکاریکردنی رێژەی دانیشتووانی هەرێمی کوردستان، لە سەرژمێریی گشتیی دانیشتووانی عێراق، لە لایەن وەزارەتی پلاندانانی فیدراڵەوە رەت دەکاتەوە و هەنگاوی پێویستیش دەگرێتە بەر.

ئەمڕۆ چوارشەممە 11ـی شوباتی 2026، بە سەرپەرشتی سەرۆک وەزیران مەسرور بارزانی و ئامادەبوونی قوباد تاڵەبانی جێگری سەرۆکوەزیران، ئەنجوومەنی وەزیرانی هەرێمی کوردستان کۆبووەوە .

لە بڕگەی یەکەمی کۆبوونەوەی ئەمڕۆی ئەنجوومەنی وەزیراندا، دارا رەشید وەزیری پلاندانان، راپۆرتێکی تێروتەسەلی بە داتا و ژمارەی ورد لەسەر سەرژمێریی دانیشتووانی عێراق خستە روو کە مانگی 11ـی ساڵی 2024 ئەنجامدرا و بە گوێرەی راگەیەندراوی فەرمی ئەنجامی سەرژمێرییەکە، رێژەی دانیشتووانی هەرێمی کوردستان (جگە لە ناوچە کوردستانییەکانی دەرەوەی هەرێم) بە 14.1% دەستنیشان کرا.

سەرژمێرییەکە، پێشوەختە لە چوارچێوەی رێککەوتنی نێوان هەردوولا ئەنجامدرا کە بە چەند بڕیارێکی ئەنجوومەنی  وەزیرانی فیدراڵ پەسەند کرا و حکوومەتی فیدراڵ پابەند دەکات بە جێبەجێکردنی رێککەوتننامە و بڕیارەکانی خودی ئەنجوومەنی وەزیرانی فیدراڵ، کە بەداخەوە وەزارەتی پلاندانانی فیدراڵ، لە دەرەوەی ئەو بڕیارانە و پێچەوانەی رێكکەوتنی هاوبەشی هەردوو حکوومەتی هەرێم و فیدراڵ، رەفتاری کردووە لەگەڵ دەرئەنجامی فەرمی سەرژمێرییەکە، ئەمەش کاریگەریی نەرێنیی دەبێت لەسەر شایستەکانی هەرێمی کوردستان و پێویستی بە رێکاری بە پەلە هەیە بۆ راستکردنەوەی.

لە کۆبوونەوەی ئەنجوومەنی وەزیراندا، دوای گفتوگۆ و راگۆڕینەوە و خستنەڕووی چەند سەرنج و تێبینیەک لەسەر بابەتی سەرژمێریی و لێکەوتەکانی، ئەنجوومەنی  وەزیران، وێرای دەستخۆشی لە وەزیری پلاندانان بۆ ئامادەکردنی راپۆرتەکە، دەستکاریکردنی رێژەی دانیشتووانی هەرێمی کوردستانیش لە لایەن وەزارەتی پلاندانانی فیدراڵەوە رەت دەکاتەوە و هەنگاوی پێویستیش دەگرێتە بەر بۆ راستکردنەوەی هەڵە و دەستکاریکردنەکان، داواش لە حکوومەتی فیدراڵ دەکات پابەند بێت بە رێککەوتنە هاوبەشەکان و ئەنجامی فەرمی راگەیەنراوی سەرژمێرییەکە، کە رێژەی هەرێمی کوردستان 14.1%ـە .

لە هەمان کاتدا، ئەنجوومەنی  وەزیران داوا لە سەرۆکایەتیی کۆمار و فراکسیۆنە کوردستانییەکانی ئەنجوومەنی  نوێنەرانی عێراق دەکات، وەک ئەرکێکی دەستووریی و یاسایی و نیشتمانیی خۆیان، بەرگری لە مافەکانی خەڵکی کوردستان بکەن و رێگە نەدەن دەستکاریی ئەنجامەکانی ئەم سەرژمێرییە بکرێت و نابێت قبووڵی بکەن رێژەی دانیشتووانی هەرێم لە رێژەی فەرمی راگەیەنراوی خۆی کەم بکرێتەوە.

ئەنجوومەنی  وەزیرانی هەرێمی کوردستان، هەروەها داوا لە حکوومەتی فیدراڵ دەکات پابەند بێت بە ئەنجامی سەرژمێرییەکە و رێژەی دانیشتووانی هەرێم کە 14.1%ـە ، بکرێتە بنەما بۆ دەستنیشانکردنی بەشە بودجەی هەرێمی کوردستان و شایستە دەستوورییەکانی.

لە بڕگەی دووەمی کۆبوونەوەکەی ئەمڕۆی ئەنجوومەنی وەزیرانی هەرێمی کوردستان، گفتوگۆ لەبارەی بابەتی پەسەندکردنی کۆنووسی لەیەکترگەیشتنی هاوبەشی نێوان وەزارەتی کاروباری شەهیدان و ئەنفالکراوان و دەزگای زیندانیانی سیاسی عێراق کرا، کە تایبەتە بە یەکخستنی ئیمتیازات و شایستە داراییەکانی زیندانیيان و گیراوانی سیاسی لە هەرێمی کوردستان لەگەڵ هاوتاکانیان لە ناوچەکانی دیکەی عێراق، پشتبەست بە ماددەی 132ـی دەستوور و یاسای ژمارە 10ـی ساڵی 2025ـی هەمواری یاسای زیندانیيانی سیاسیی عێراق، لەم بارەیەوە سەرەتا عەبدوڵڵا حاجی مەحموود، وەزیری کاروباری شەهیدان و ئەنفالکراوان، پوختەیەکی بابەتەکەی بۆ ئەنجوومەنی وەزیران خستە روو و دواتریش ئامانج رەحیم سکرتێری ئەنجوومەنی وەزیران وردەکاریی دەستووریی، یاسایی و لایەنی دارایی بابەتەکەی خستە روو.

ئەنجوومەنی  وەزیران پشتگیریی لەهەر هەنگاوێک دەکات بە ئاراستەی خزمەتکردنی زیاتری زیندانییان و تاگیراوانی سیاسیی لە هەرێمی کوردستان و سوودمەندبوونیان لە هەمان شایستەی دارایی و ئیمتیازاتی هاوتاکانیان لە ناوچەکانی دیکەی عێراق، لە هەمانکاتدا جەخت کرایەوە لە رەچاوکردنی تایبەتمەندییە دەستوورییەکانی هەرێمی کوردستان و داڕشتنی میکانیزمیی پێویست بۆ زامنکردنی خەرجکردنی ئەو شایستە داراییانە بۆ زیندانیان و گیراوانی سیاسیی کە بە گوێرەی ماددەی 132ـی دەستوور، ئەرک و بەرپرسیارێتی دەستووریی حکوومەتی فیدراڵیە بە یەک چاو سەیری هەموو زیندانیانی سیاسیی بکات لە سەرتاسەری عێراق بە هەرێمی کوردستانیشەوە، بۆ ئەم مەبەستە، وەزارەتی کاروباری شەهیدان و ئەنفالکراوان راسپێردرا کە درێژە بە گفتوگۆ و کۆبوونەوەکانیان لەگەڵ دەزگای زیندانییانی سیاسی عێراق بدەن بۆ دەستنیشانکردنی میکانیزم و چوارچێوەی روون و دیار بۆ جێبەجێکردنی ئەم بابەتە بە رەچاوکردنی ئەو سەرنج و تێبینیانەی لە کۆبوونەوەکە خرانە روو.