پێشەوا هەورامانی: وەزارەتی دارایی ئامادەکاری بۆ مووچەی مانگی دوو کردووە

گوتەبێژی حکوومەتی هەرێمی کوردستان وردەکاریی کۆبوونەوەی ئەمڕۆی ئەنجومەنی وەزیرانی خستە ڕوو و رایگەیاند، حکوومەتی هەرێم نیگەرانە لە دەستکاریکردنی ئەنجامی سەرژمێری لە لایەن وەزارەتی پلاندانانی فیدراڵەوە. هاوکات هەواڵێکی خۆشی بۆ فەرمانبەران راگەیاند کە ئامادەکاری بۆ لیستی مووچەی مانگی شوبات دەستی پێکردووە.

ئەمڕۆ چوارشەممە، 11ـی شوباتی 2026، پێشەوا هەورامانی، گوتەبێژی حکوومەتی هەرێمی کوردستان، لە لێدوانێکدا بۆ کوردستان24 ناوەرۆکی کۆبوونەوەی ئەنجوومەنی وەزیرانی هەرێمی کوردستانی خستە روو، کە تێیدا پرسەکانی سەرژمێری، مووچە، زیندانیانی سیاسی و بەشەخۆراکی هاووڵاتییان تاوتوێ کراون.

سەبارەت بە پرسی سەرژمێریی گشتیی دانیشتووان، گوتەبێژی حکوومەت رایگەیاند: کە ئەم بابەتە بە تێروتەسەلی لە کۆبوونەوەکەدا گفتوگۆی لەبارەوە کراوە. 

هەورامانی ئاماژەی بەوە دا، کە "لە ماوەکانی رابردوودا رێککەوتنێکی فەرمی لە نێوان هەردوو حکوومەتی هەرێم و فیدراڵ هەبوو، کە بە پێی ئەو رێککەوتنە نابێت هیچ داتا و ئامارێکی پەیوەست بە سەرژمێرییەوە بڵاو بکرێتەوە بەبێ رەزامەندی و رێککەوتنی هەردوولا."

پێشەوا هەورامانی نیگەرانیی حکوومەتی هەرێمی کوردستانی نیشان دا و روونی کردەوە، "وەزارەتی پلاندانانی حکوومەتی عێراق، بە شێوەیەکی یەکلایەنە دەستکاریی چەند ناوچەیەکی کردووە و گۆڕانکاریی تێدا کردوون سەبارەت بەوەی لە ڕووی ئیدارییەوە سەر بە کوێن." جەختیشی کردەوە کە حکوومەتی هەرێمی کوردستان بە هەموو شێوەیەک ئەم هەنگاوانە و دەستکاریکردنەکان رەت دەکاتەوە.

لەو بارەیەوە، گوتەبێژی حکوومەت ئاشکرای کرد کە مەسرور بارزانی، سەرۆکی حکوومەتی هەرێمی کوردستان، هەریەکە لە سەرۆکی دیوانی ئەنجوومەنی وەزیران و وەزیری پلاندانانی راسپاردووە کە بە پەلە رێوشوێنی پێویست بگرنەبەر بۆ ڕاستکردنەوەی ئەو پێشێلکارییانەی لە پرسی سەرژمێریدا کراون.

لە تەوەرێکی دیکەی لێدوانەکەیدا، پێشەوا هەورامانی زانیاریی نوێی لەبارەی مووچەی فەرمانبەرانەوە خستە روو و رایگەیاند: "وەزارەتی دارایی و ئابووریی هەرێمی کوردستان دەستی بە ئامادەکارییەکان کردووە بۆ ئامادەکردنی لیستی مووچەی مانگی شوبات (مانگی 2)، بە ئامانجی ئەوەی بە خێرایی و لە کاتی خۆیدا لیستەکە رەوانەی بەغدا بکرێت و شایستە داراییەکان خەرج بکرێن."