پلەکانی گەرما نزم دەبنەوە؛ کەشناسی هۆشداری لە بارانی بەهاری و تەرزە دەدات
بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان، پێشبینییەکانی بۆ بارودۆخی کەشوهەوای 24 کاتژمێری داهاتوو بڵاوکردەوە و رایگەیاند: کە شەپۆلێکی بارانبارینی بەهاری کە هەورە تریشقە و تەرزەی لەگەڵدا دەبێت، زۆربەی ناوچەکانی هەرێمی کوردستان دەگرێتەوە و دەبێتە هۆی نزمبوونەوەی پلەکانی گەرما.
هەینی، 17ـی نیسانی 2026، بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان لە راپۆرتی فەرمی خۆیدا بۆ کەشوهەوای 24 کاتژمێری داهاتوو، ئاماژە بە گۆڕانکاریی لە بارودۆخی بەرگەهەوای ناوچەکە دەکات.
بە پێی پێشبینییەکان، ئاسمانی هەرێم بە گشتی دەبێتە هەوری تەواو و لە بەیانییەوە بارانبارین بە شێوەیەکی لاواز لە ناوچەکانی رۆژئاواوە دەست پێدەکات.
راپۆرتەکە ئاماژەی بەوە کردووە، کە لە کاتەکانی دوای نیوەڕۆ و ئێوارەی سبەینێدا، بارانبارین زۆربەی ناوچەکانی هەرێم دەگرێتەوە و ئاستەکەی دەبێتە مامناوەند. لە هەندێک ناوچەدا بارانەکە بە شێوەی لێزمە باران و هەورە تریشقە دەبێت، هاوکات پێشبینی تاوە بارانی بەهاری، گەواڵە باران و تەرزە باران لە زۆرینەی ناوچەکان دەکرێت.
پێشبینی دەکرێت پلەکانی گەرما لە کاتەکانی پێش نیوەڕۆدا جێگیر بن، بەڵام لە دوای نیوەڕۆوە نزمبوونەوەیەک بە بڕی (2 - 4) پلەی سیلیزی تۆمار دەکرێت.
بەرزترین پلەکانی گەرمای پێشبینیکراو بەم شێوەیەیە:
هەولێر: 22 پلەی سیلیزی
سلێمانی: 24 پلەی سیلیزی
دهۆک: 20 پلەی سیلیزی
گەرمیان: 26 پلەی سیلیزی
هەڵەبجە: 25 پلەی سیلیزی
زاخۆ: 21 پلەی سیلیزی
سۆران: 21 پلەی سیلیزی
پیرمام: 19 پلەی سیلیزی
چەمچەماڵ: 25 پلەی سیلیزی
حاجی ئۆمەران: 15 پلەی سیلیزی