کشتوکاڵی هەولێر جووتیاران ئاگادار دەکاتەوە
بەڕێوەبەری گشتی کشتوکاڵی هەولێر ئاگاداری جووتیاران دەکاتەوە قۆناغەکانی دیکەی شایستەیە داراییەکانی جوتیاران دابەش دەکرێت.
ئەمڕۆ دووشەممە، 20ـی نیسانی 2026، هێمن سەید موراد، بەڕێوەبەری گشتیی کشتوکاڵی هەولێر بە ماڵپەڕی کوردستان24ـی راگەیاند: جووتیارانی سنووری پارێزگای هەولێر ئاگادار دەکەینەوە لە رۆژانی داهاتوودا قۆناخێکی دیکەی شایستە داراییەکانی بە سەر جووتیاران دابەش دەکرێت لە هەفتەی داهاتوودا سەردانی بەڕێوەبەرایەتی سایلۆی هەولێر بکەن.
بەڕێوەبەری گشتیی کشتوکاڵی هەولێر ئاماژەی بەوە دا، قۆناخەکانی پێدانی شایستە داراییەکانی جووتیاران لە لایەن حکوومەتی عێراقەوە زۆر بە سیستی دابەش دەکرێت بە بەردەوام، بەڕێوەبەرایەتی گشتی کشتوکاڵی هەولێر لە رێگەی نوێنەرانی ئەنجوومەنی نوێنەرانی عێراق و نۆێنەرایەتی حکوومەتی هەرێمی کوردستان جەخت کراوە تا فشار بخرێتە سەر وزارەتی بازرگانی عێراق بۆ ئەوەی زووتر شایستە داراییەکانی جووتیاران خەرج بکرێت.
هاوکات ئەمڕۆ دووشەممە، سەروەر کەمال هاواری، بریکاری وەزارەتی بازرگانی و پیشەسازی هەرێمی کوردستان لە لێدوانێکی تایبەتدا بۆ کوردستان24، رایگەیاند؛ ئەم بڕە پارەیە وەک "قۆناخی چوارەم"ی شایستە داراییەکانی جووتیاران بۆ ساڵی 2025 هەژمار دەکرێت.
بەگوێرەی زانیارییەکانی بریکاری وەزارەتی بازرگانی، دابەشبوونی پارەکە بەسەر پارێزگاکانی هەرێمی کوردستاندا بەم شێوەیە دەبێت:
پارێزگای سلێمانی: 3 ملیار و 498 ملیۆن دینار.
پارێزگای هەولێر: 2 ملیار و 842 ملیۆن دینار.
پارێزگای دهۆک: 2 ملیار و 605 ملیۆن دینار.