شوێنەواری هەرێمی کوردستان: بەفر و باران زیانیان بە خانووە کۆنەکان گەیاندووە
بەڕێوەبەری گشتیی شوێنەواری هەرێمی کوردستان ئاماژە بەوە دەکات، بەهۆی بەفر و بارانەوە زیان بەر خانووە شوێنەوارییەکان کەتووە، هەروەها داتابەیسی تایبەت بۆ تەواوی پێگە شوێنەوارییەکان دروستدەکرێت.
ئەمڕۆ سێشەممە، 28ـی نیسانی 2026، کەیفی مستەفا، بەڕێوەبەری گشتیی شوێنەوار و کەلەپوری هەرێمی کوردستان بە ماڵپەڕی کوردستان24ـی گوت: لە هەرێمی کوردستان تاوەکو ئێستا رووپێوی بۆ ٪48 زەوی کراوە بۆ دۆزینەوەی پێگەی شوینەواری نوێ.
بەڕێوەبەری گشتیی شوێنەوار و کەلەپوری هەرێمی کوردستان ئاماژەی بەوە دا، زۆرترین پێگەی شوێنەواری لە پارێزگای دهۆک دۆزراونەتەوە، چونکە زۆرترین کنە و پشکنین لەو سنوورە کراوە.
دەربارەی ئەو بەفر و بارانەی ئەمساڵ تەواوی ناوچە جیاوازەکانی هەرێمی کوردستانی گرتەوە، کەیفی مستەفا رایگەیاند، گۆڕانی کەشوهەوا و ئەو بەفر و بارانە زیانی زۆری بە خانووە شوێنەوارییەکان گەیاندووە، بەتایبەتی لە هەولێر و سلێمانی و زاخۆ و کۆیە و ئاکرێ و کفری، کە تەمەنی بەشێک لەو خانووانە بۆ زیاتر لە سەدەیەک دەگەڕێنەوە.
بەڕێوەبەری گشتیی شوێنەواری هەرێمی کوردستان باس لەوە دەکات، پێویستیان بە بودجەی تایبەت هەیە بۆ ئەوەی بتوانن کاری زیاتر لەسەر شوێنەوار و پێگە شوێنەوارییەکانی هەرێمی کوردستان بکەن، لەگەڵ ئەوەشدا چەندین کاری تایبەت کراوە کە سوودی زۆری بۆ توێژەران و شوێنەوارناسەکان دەبێت.
کەیفی مستەفا روونیکردەوە، لەگەڵ چەند زانکۆیەکی نێودەوڵەتیی راهێنانیان بە سەدان کادیر کردووە لە هەرێمی کوردستان هەروەها خەریکی دروستکردنی داتابایەسێکی تایبەتن بۆ تەواوی ناوچە و پێگە شوێنەوارییەکانی کوردستان.