تونجەر باکرهان: بەبێ دیموکراسیی خۆجێیی تورکیا لە قەیران رزگاری نابێت

هاوسەرۆکی پارتی یەکسانی و دیموکراسیی گەلان (دەم پارتی) رایدەگەیەنێت، تورکیا لە قۆناخێکی پڕ لە قەیراندایە و تەنیا رێگەی دەربازبوونیش چەسپاندنی دیموکراسییەکی بەهێز و چارەسەرکردنی پرسی کوردە بە شێوەیەکی ئاشتییانە.

ئەمڕۆ دووشەممە، 8ـی حوزەیرانی 2026، تونجەر باکرهان، هاوسەرۆکی دەم پارتی لە نوێترین لێدوانیدا رایگەیاند "ئێمە ئێستا لە قۆناخێکی پڕ لە قەیرانداین؛ تورکیا پێویستی بە دیموکراسییەکی بەهێز و کوردیش پێویستی بە ئاشتییە. کاتی ئەوە هاتووە لەبری هەڵکوتانە سەر پارتەکان و فشارە سەربازییەکان، زەمینەی سیاسەتێکی ئازاد بێتە کایەوە."

باکرهان ئاماژەی بەوە کرد کە گەلی کورد دوای تێپەڕبوونی سەد ساڵ، دەیەوێت بە شێوەیەکی دیموکراسی و لە رێگەی دیموکراسیکردنی کۆمارەوە ببێتە بەشێک لە پڕۆسەی سیاسی، گوتیشی "ئەم سەدەیە دەبێت ببێتە سەدەی کۆماری دیموکراسی."

سەبارەت بە پرسی شارەوانییەکان و دەستبەسەرداگرتنی ئیرادەی گەل، هاوسەرۆکی دەم پارتی گوتی: دەبێت سیاسەتی دەستبەسەرداگرتنی شارەوانییەکان و دانانی قەیوم کۆتایی پێ بهێنرێت، داوا دەکەین دەسەڵات واز لە سیاسەتی جیاکاری بەرامبەر شارەوانییەکانمان بهێنێت."

پرۆسەی نوێی ئاشتی لە تورکیا:

26ی تشرینی دووەمی 2024، دەستپێشخەری دەوڵەت باخچەلی، سەرۆکی مەهەپە بۆ ئاشتی.

28ی کانوونی یەکەمی 2024، دیداری پەروین بوڵدان و سرى سوورەیا ئۆندەر، شاندی دەم پارتی و عەبدوڵڵا ئۆجەلان لە زیندانی ئیمراڵی.

پەیامی ئۆجەلان "بەهێزکردنی برایەتیی تورک - کورد نەک هەر بەرپرسیارێتییەکی مێژویییە، بەڵکو پرسێکی گرنگ و بەپەلەی چارەنوسسازە بۆ کۆی گەلان. بۆ بەهێزکردنی ئەو پرۆسەیە، گرنگە هەموو بازنە سیاسییەکان لە تورکیا لەسەروی حیساباتی تەسک و کورت مەودا بیربکەنەوە، دەستپێشخەریی بکەن و بونیادنەرانە هەنگاو بنێن و ئەرێنییانە بەشداریی بکەن."

1ی ئاداری 2025 راگەیاندنی ئاگربەست و رەخساندنی زەمینەی گفتوگۆ.

5-7ی ئایاری 2025، بەڕێوەچوونی کۆنگرەی 12ی پەکەکە.

 بڕیاری خۆهەڵوەشاندنەوەی رێکخراوەیی و کۆتاییهێنان بە خەباتی چەکداری.

11ی تەممووزی 2025، سووتاندنی چەک لەلایەن گرووپێکی 30 کەسی بە سەرۆکایەتیی بەسێ هۆزات، هاوسەرۆکی کەجەکە، لە رێوڕەسمێکدا لە بەردەم ئەشکەوتی جاسەنە لە سنووری شارۆچکەی دوکان – سلێمانی.