داودئۆغڵو: لەگەڵ سەرۆک بارزانی لە ساتە سەختەکاندا شانبەشانی یەک وەستاوین

رۆژی سێشەممە، 9ـی حوزەیرانی 2026، ئەحمەد داودئۆغڵو، سەرۆکی پارتی ئاییندە، لە هەڤپەیڤینێکی تایبەتدا لەگەڵ کەناڵی "کوردستان24" تیشکی خستە سەر سەردانەکەی بۆ هەرێمی کوردستان و گرنگیی دیدارەکانی لەگەڵ سەرکردایەتیی سیاسیی هەرێمەکە.

داودئۆغڵو وێڕای دەربڕینی خۆشحاڵی بە گەیشتنی بۆ هەرێمی کوردستان، ڕایگەیاند کە سەردانەکەی بۆ هەولێر وەک گەڕانەوەیە بۆ ماڵی خۆی.

 ئاماژەی بەوەش دا، کە لە ماوەی دوو ساڵی رابردوودا چوار جار سەردانی شارەکانی هەولێر، سلێمانی و دهۆکی کردووە بە مەبەستی راوێژ و بەشداریکردن لە کۆڕبەندە جیاوازەکاندا.

لەبارەی کۆبوونەوەکانی لەگەڵ سەرۆک مەسعود بارزانی و مەسرور بارزانی، سەرۆکی حکوەمەتی هەرێمی کوردستان، داودئۆغڵو رایگەیاند: "کۆبوونەوەیەکی دوو کاتژمێریم لەگەڵ مەسرور بارزانی و دیدارێکی کاتژمێر و نیویم لەگەڵ سەرۆک بارزانی ئەنجامدا. ئێمە دۆستایەتییەکی 24 ساڵەمان هەیە و لە ساتە سەختەکاندا هەمیشە پاڵپشتیی یەکدی بووین." 

روونیشی کردەوە، کە لە دیدارەکاندا هەڵسەنگاندن بۆ دۆخی گشتیی جیهان، لێکەوتەکانی هێرشی ئەمریکا و ئیسرائیل بۆ سەر ئێران، کاریگەریی جەنگ لەسەر ناوچەکە و پەیوەندییەکانی نێوان تورکیا، عێراق و هەرێمی کوردستان کراوە.

سەبارەت بە هەڵوێستی بێلایەنانەی هەولێر لە جەنگەکانی ئێستای ناوچەکەدا، سەرۆکی پارتی ئاییندە پاڵپشتیی خۆی بۆ سیاسەتی ئێستای هەرێمی کوردستان دەربڕی و بە سیاسەتێکی "زۆر دروست" وەسفی کرد. گوتیشی: "کورد لە جەنگەکانی رابردوودا، بە تایبەت لە جەنگی عێراق-ئێران و کارەساتی هەڵەبجەدا، زۆرترین باجی داوە، بۆیە پاراستنی بێلایەنی لەم قۆناغەدا رێگرە لە دووبارەبوونەوەی ئەو نەهامەتییانە."

داودئۆغڵو، ستایشی ئەزموونی مێژوویی سەرۆک مەسعود بارزانی کرد لە پاراستنی پێگەی هەرێمدا. دەشڵێت: سەرۆک بارزانی تاکە سەرکردەی سیاسیی کارایە لە ناوچەکەدا کە لە دوای ساڵی 1991 و داگیرکردنی کوەیتەوە شاهێدی گۆڕانکارییەکانە، لە کاتێکدا سەرکردە هاوچەرخەکانی وەک حوسنی موبارەک، یاسر عەرەفات، حافز ئەسەد و شا حوسێن کۆچی دواییان کردووە. 

ئەو جەختی کردەوە کە ئەم ئەزموونە دەوڵەمەندە بووەتە هۆی ئەوەی کە کوردانی عێراق نەبنە ئامرازی ململانێی هێزە دەرەکییەکان و هەرێمەکە لە جەنگ و ئاڵۆزییەکان بەدوور بگیرێت. گوتیشی: سەرۆک بارزانی بە بڕیارێکی حەکیمانە هەرێمی کوردستانی پاراست.

داودئۆغڵو رایگەیاند: کە شاری هەولێر، وەک پایتەختی هەرێمی کوردستان، پێگەیەکی دیار و کاریگەری لەسەر ئاستی رۆژهەڵاتی ناوەڕاستدا هەیە. هەروەها بۆ دەربڕینی قووڵیی پەیوەندی و متمانەی خۆی بەم شارە مێژووییە گوتی: "من خۆم بە ئەحمەد ئەربیلی دەناسێنم"، ئەمەش وەک هێمایەک بۆ ئەو پێوەندییە دێرینەی کە لەگەڵ ناوچەکە و خەڵکەکەیدا هەیەتی.

سەبارەت بە هەڵوێستە سیاسییەکانی هەولێر لە هەمبەر قەیران و گۆڕانکارییەکانی ناوچەکە، سەرۆکی پارتی ئاییندە پاڵپشتیی خۆی بۆ بڕیارە سیاسییەکانی هەرێم دەربڕی و جەختی کردەوە کە سیاسەتی ئێستای هەرێمی کوردستان، سیاسەتێکی هاوسەنگ و زۆر دروستە، کە پارێزگاری لە سەقامگیریی هەرێمەکە دەکات.

داودئۆغڵو ئاماژەی بە پەیوەندییەکانی نێوان ئەنقەرە و هەولێر دا و رایگەیاند، دەوڵەتی تورکیا هەمیشە هەرێمی کوردستان بە هاوبەشێکی ستراتیژیی گرنگ و کاریگەر لە ناوچەکەدا دەبینێت، و پەرەپێدانی ئەم هاوبەشییە خزمەت بە بەرژەوەندییە ئابووری، سیاسی و ئەمنییەکانی هەردوولا دەکات.

هاوکات دەڵێت: کە پێکهاتە جیاوازەکان لە تورکیا و هەرێمی کوردستان، دەبێت وەک سەرچاوەی دەوڵەمەندیی کۆمەڵایەتی و فەرهەنگی تەماشا بکرێن و نابێت بە هیچ شێوازێک وەک هەڕەشە بۆ سەر ئاسایش و سەقامگیری سەیر بکرێن.

سەبارەت بە تایبەتمەندیی فرەنەتەوەیی شاری کەرکووک، سەرۆکی پارتی ئاییندە ئاماژەی بەوە دا، کە کەرکووک گوزارشت لە "عێراقێکی بچووک" دەکات، بەهۆی پێکەوەژیانی نەتەوە جیاوازەکان تێیدا، و تیشکی خستە سەر ئەوەی کە ئێستا شارەکە خاوەنی پارێزگارێکی تورکمانە، ئەمەش وەک هەنگاوێک بۆ بەشداریپێکردنی پێکهاتەکان لە کایەی بەڕێوەبردندا.

لە لایەکی دیکەوە، داودئۆغڵو پێگەی تورکمانەکانی لە هەرێمی کوردستان بەرز نرخاند و جەختی کردەوە کە پێکهاتەی تورکمان لە هەرێمی کوردستان لە دۆخێکی گونجاو و باشدان، ئەمەش بەهۆی ئەو فەزای سەقامگیری و سیاسەتی پێکەوەژیانەی کە لە هەرێمەکەدا پەیڕەو دەکرێت.

هاوکات گوتیشی: کاریگەربوونی پارتی لە عێراق بۆ ئێمە زۆر گرنگە، سەرۆک بارزانی ئەو خاوەن سەرکردایەتیی تایبەتە و خاوەنی ئەزموونێکی گەورەیە، پێویستە ئەمە رەنگدانەوەی بەسەر بەغداەوە هەبێت.

ئاماژەی بەوەش کرد، پێویستە سەرکردەکانی عێراق سوود لە ئەزموونی سەرۆک بارزانی وەربگرن.

نوێ دەکرێتەوە.