گرۆسی و فواد حسێن تاوتوێی ئاسایشی ئەتۆمی لە کەنداو دەکەن
بەڕێوەبەری گشتی ئاژانسی نێودەوڵەتی وزەی ئەتۆم (IAEA)، رایگەیاند، گفتوگۆیەکی گرنگی لەگەڵ وەزیری دەرەوەی عێراق کردووە، سەبارەت بە پاراستنی ئاسایشی ئەتۆمی لە ناوچەی کەنداو و رێگری لە بڵاوبوونەوەی چەکی ئەتۆمی.
هەینی 12ـی حوزەیرانی 2026، رافائیل گرۆسی، بەڕێوەبەری گشتی ئاژانسی نێودەوڵەتی وزەی ئەتۆم لە هەژماری فەرمی خۆی لە تۆڕی کۆمەڵایەتیی (ئێکس) ئاشکرای کرد، پەیوەندییەکی تەلەفۆنی لەگەڵ فواد حسێن، وەزیری دەرەوەی عێراق کردووە و تێیدا بیروڕایان کردووە سەبارەت بە دوایین پەرەسەندنەکانی پەیوەست بە سەلامەتی و ئاسایشی ئەتۆمی لە کەنداو ئاڵوگۆڕ.
بەڕێوەبەری گشتی ئاژانسی نێودەوڵەتی وزەی ئەتۆم گوتی: "گفتوگۆمان کرد لەسەر ئاڵنگارییەکانی ئێستا بۆ رێگری لە بڵاوبوونەوەی چەکی ئەتۆمی."
گرۆسی سوپاسی فواد حسێنی کرد بۆ ئامادەیی و پابەندبوونی عێراق بۆ کارکردنی پێکەوەیی لە پێناو بەدیهێنانی ئەو ئامانجە گرنگانەدا. ئەم پەیوەندییە لە کاتێکدایە کە عێراق هەوڵ دەدات وەک ناوبژیوانێک یان لایەنێکی کاریگەر رۆڵ ببینێت لە هێورکردنەوەی دۆخی ناوچەکە.
هاوکات فواد حسێن، رایگەیاند، پەیوەندییەکی تەلەفۆنی لە بەڕێوەبەری ئاژانسی نێودەوڵەتی وزەی ئەتۆمەوە پێگەیشتووە و تێیدا بیروڕایان ئاڵوگۆڕ کردووە سەبارەت بە پەرەسەندنەکانی ناوچەکە و هەوڵەکان بۆ کەمکردنەوەی گرژییەکان.
ئاماژەشی داوە، لە میانەی گفتوگۆکەدا، وەزیری دەرەوەی عێراق جارێکی دیکە سەرکۆنەی ئەو هێرشانەی کرد کە دامەزراوە مەدەنی و ژێرخانەکان دەکەنە ئامانج، بە تایبەتی ئاماژەی بە هێرشەکەی سەر وێستگەی وزەی ئەتۆمی "بەراکە" لە وڵاتی ئیمارات کرد و وەک هەڕەشەیەک بۆ سەر ئاسایشی ناوچەکە وەسفی کرد.
فواد حسێن جەختی کردەوە کە عێراق دژی هەر جۆرە فراوانبوونێکی شەڕ یان هەڕەشەیەکە بۆ سەر ئاسایشی وڵاتانی ناوچەکە و گوتی: "عێراق ئامادەیە بۆ هاوکاری و هەماهەنگی لەگەڵ وڵاتانی برا و دۆست بەو شێوازەی کە خزمەت بە بەهێزکردنی ئاسایشی بەکۆمەڵ دەکات."
وەزیری دەرەوەی عێراق دووپاتی کردەوە کە وڵاتەکەی پاڵپشتی لە چارەسەرە ئاشتیانەکان و گفتوگۆ دەکات وەک تەنیا رێگە بۆ چارەسەرکردنی قەیرانەکان و دوورکەوتنەوە لە توندتربوونی گرژییەکان.