خزمەتگوزاریی جیاکردنەوەی خێزان لە پسوولەی خۆراک کارا کرا

ئەمڕۆ دووشەممە، 22ـی حوزەیرانی 2026، وەزارەتی بازرگانیی عێراق رایگەیاند، خزمەتگوزاریی جیاکردنەوەی خێزان لە "پسوولەی خۆراکی ئەلیکترۆنی" لە سەرجەم پارێزگاکانی عێراق و هەرێمی کوردستان کارا کرا.

تاڵب حەسەن نیعمە، بەڕێوەبەری گشتیی فەرمانگەی پلان دانان و بەدواداچوون، لە وەزارەتی بازرگانی عێراق لە راگەیەندراوێکدا ئاماژەی بەوەکرد، خزمەتگوزارییەکە لە پارێزگاکانی هەولێر، سلێمانی، دهۆک، هەڵەبجە، نەینەوا، کەرکووک، بەسرە، زیقار، میسان، دیوانییە، موسەننا، سەڵاحەدین، ئەنبار، کەربەلا، نەجەف کارا کراوە.

گوتیشی: ئەم هەنگاوە لە چوارچێوەی هەوڵەکانی وەزارەتدایە بۆ پەرەپێدانی خزمەتگوزارییەکانی پسوولەی خۆراک و هێنانەکایەی ئاسانکاریی زیاتر بۆ هاووڵاتییان، ئەوەش لە رێگەی بەکارهێنانی سیستمە تەکنەلۆژییە هاوچەرخەکانەوە.

بەڕێوەبەری گشتی ئاماژەی بەوەش کرد، پێشتر ئەم خزمەتگوزارییە ئەلیکترۆنییە لە پارێزگاکانی بەغدا، واست، بابل و دیالە خرابووە کار، بەمەش لە ئێستا پڕۆژەکە لە تەواوی وڵاتدا گشتگیر کراوە و سەرجەم هاووڵاتییان دەتوانن لە لقەکانی پسوولەی خۆراک لەم خزمەتگوزارییە سوودمەند بن.