بریکاری وەزارەتی رۆشنبیری: هەولێر دەبێتە سەنتەرێکی جیهانی بۆ کۆکردنەوەی هونەرمەندان

ئاریان سەڵاحەدین، بریکاری وەزارەتی ڕۆشنبیری و لاوان رایدەگەیەنێت، گەورەترین گەلەری هونەری لەسەر ئاستی ناوچەکە لە هەولێری پایتەخت بونیاد دەنرێت و دەشڵێت "ئەم پڕۆژەیە دەبێتە دەلاقەیەک بۆ ناساندنی کلتووری کورد بە جیهان و کۆکردنەوەی هونەرمەندانی نێودەوڵەتی لە پایتەخت."

ئەمڕۆ دووشەممە، 13ـی تەممووزی 2026، ئاریان سەڵاحەدین، بریکاری وەزارەتی رۆشنبیری و لاوانی حکوومەتی هەرێمی کوردستان بە ماڵپەڕی کوردستان24ـی رایگەیاند: کارکردن بۆ دروستکردنی گەورەترین گەلەری هونەری لەسەر ئاستی ناوچەکە دەستیپێکردووە، کە ئامانجی سەرەکی لێی دروستکردنی پردێکی پەیوەندییە لە نێوان هونەرمەندانی ناوخۆ و جیهان، بەتایبەتی لە بواری هونەری شێوەکاریدا.

بریکاری وەزارەتی ڕۆشنبیری ئاماژەی بەوە کرد، لەم گەلەرییەدا تابلۆی هونەرمەندە ناودارەکانی جیهان نمایش دەکرێن، ئەمەش دەرفەتێکی زێڕین بۆ هونەرمەندانی کورد دەڕەخسێنێت تاوەکو کارەکانیان برەو پێ بدەن. گوتیشی "هونەرمەندانی ئێمە بەردەوام لە دەرەوەی وڵات بەشدار دەبن، بەڵام هونەرمەندانی بیانی و رۆژئاوایی کەمتر سەردانی هەرێمی کوردستانیان کردووە؛ بە تەواوبوونی ئەم پڕۆژەیە، دەرفەتێکی ناوازە بۆ ناسین و لێکنزیکبوونەوەی هەردوولا دەڕەخسێت."

ئاریان سەڵاحەدین ئاشکراشی کرد، کە کونسوڵخانە و نێردە دیپلۆماسییەکانی ناو هەرێمی کوردستان چەندین جار جەختیان لە گرنگیی بوونی پڕۆژەیەکی لەم شێوەیە کردووەتەوە، بۆ ئەوەی کلتووری کوردی زیاتر بە جیهان بناسێندرێت و پەیوەندییە کلتوورییەکان بەهێزتر بکرێن.

سەبارەت بە شوێنی پڕۆژەکە، بریکاری وەزارەتی ڕۆشنبیری رایگەیاند، هەڵبژاردنی پارکی شەهید سامی عەبدولڕەحمان و نزیکیی لە "کتێبخانەی زەیتوونە"، پاڵپشتییەکی گەورە بە پڕۆژەکە دەدات و هەولێر دەکاتە سەنتەرێکی گەورەی کۆکردنەوەی داهێنەران.

هاوکات جیا لەو پرۆژە هونەرییە، مۆزەخانەیەکی سەردەمییانە دروستبکرێت، وەک ناسنامەیەکی کلتووری و مێژوویی، دەبێتە بەڵگەیەکی زیندوو بۆ ناساندنی ئەو تاوانە گەورەیەی دەرهەق بە گەلەکەمان کراوە و یادەوەریی قوربانیان بۆ نەوەکانی داهاتوو دەپارێزێت."

بڕیارە هەردوو پڕۆژە ستراتیژییەکە لە نێو پارکی شەهید سامی عەبدولڕەحمان جێبەجێ بکرێن، کە پێکەوە سیمایەکی شارستانی و کلتووریی نوێ بە هەولێری پایتەخت دەبەخشن.