Xwendekarên mamosteyekî kurd di pêşbirkeke navdewletî de serkeftî bûn

Stenbol (K24) – Li bajarê Stenbolê, xwendekarên mamosteyekî Kurd ê bîrkariyê di pêşbirkeke navdewletî ya bîrkariyê de serkeftineke berbiçav bi dest xistin. Ev tîma serkeftî li seranserê Tirkiyeyê bû yekemîn û di asta cîhanê de jî kete rêza 33emîn.

Ev serkeftina geş a xwendekaran, fîlma navdar a cîhanî ya bi navê “Her Zarok Taybet e” careke din anî bîra mirovan. Mamoste Bedîrxan Marûnsî, ku li pişt vê serkeftinê ye, dide zanîn ku ew xwendekarên xwe bi rê û rêbazên taybet û nûjen fêrî bîrkariyê dike.

Mamoste Marûnsî herwiha hêviya xwe ya mezin jî tîne ziman ku rojekê derfet çêbibe li Herêma Kurdistanê mamostetiyê bike û pisporiya xwe di warê bîrkariyê de bigihîne zarok û xwendekarên Kurd ên li wir.

Ev serkeftin ne tenê ji bo xwendekar û mamosteyê wan, lê herwiha ji bo perwerdehiya bi rêbazên afirîner jî mînakeke hêja ye û girîngiya piştgiriya li mamoste û xwendekarên jêhatî careke din radixe ber çavan.