"Ji ber guşarên Bexdayê Barzanî li serxwebûnê difikire"

K24 – Hewlêr

Cîgirê berê yê serokkomarê Iraqê Eyad Elawî, ragihand ku ji ber guşarên Bexdayê Serokê Herêma Kurdistanê Mesûd Barzanî li serxwebûnê difikire.

Di hevpeyvînekê de ligel rojnameya Şerq El-Ewset a Erebî ku îro hatiye belavkirin, cîgirê berê yê serokkomarê Iraqê Eyad Elawî, behsa rewşa Iraq û navçeyê dike û dibêje: "Ji ber polîtîkayên me yên çewt xelk ji Iraqê bêzar bûye û dibêm xwezî bi serdema Sedam."

Elawî, polîtîkayên hikûmeta rexne dike û derbarê peywendiyên navbera hikûmeta Bexdayê û Herêma Kurdistanê de jî wiha dibêje: "Hikûmeta Bexdayê ligel Herêma Kurdistanê ne zelal e, ji ber guşar û nedîtina rola Herêma Kurdistanê, Barzanî li serxwebûnê difikire."

Her di heman hevpeyvînê de Eyad Elawî, Hevpeymaniya Welatên Îslamî bo rûbirûbûna DAIŞê wek hevpeymaniyeke nerm binav dike û daxwaz dike ku Iraq jî beşdarî wê hevpeymaniyê bibe.