Mesrûr Barzanî: Xelkê Kurdistanê pêşwazî li kuştina Ebû Îbrahîm El Qureyşî dikin

Hewlêr (K24) – Serokwezîrê Herêma Kurdistanê Mesrûr Barzanî kêfxweşiya xwe ji bo kuştin û jinavbirina Ebû Îbrahîm El Haşimî El Qureyşî yê bi nasnavê "Hacî Ebdullah" nîşan da.

Şeva borî, hêzên artêşa Amerîkayê, li bakurê Sûriyê çûn ser xaniyekî sê qatî, ku berpirsê yekem ê DAIŞê, xwe tê de veşartibû.

Li gor ragihandina fermî ya Amerîkayê, di dema êrîşê de Ebû Îbrahîm El Haşimî El Qureyşî xwe teqandiye û ji ber vê yekê jin û zarokên wî jî canê xwe ji dest dan.

Li ser vê mijarê, Serokwezîrê Herêma Kurdistanê Mesrûr Barzanî li ser hesabê xwe yê Twitterê, pîrozbahî li operasyona Serokê Amerîkayê Joe Biden û artêşa Amerîkayê kir.

Serokwezîr Mesrûr Barzanî diyar kir: “Xelkê Kurdistanê bi giştî û bi taybetî Êzidî kêfxweş in bi jinavbirina wî terorîstî.”

Herwiha destnîşan kir; hîn jî metirsiya terorê bi dawî nebûye û divê ji bo berdewamiya şerê teror û jinavbirina şûnwarên wê terorê, Amerîka û hevpeymanên wê berdewam bin di piştevanîkirina hêzên Pêşmerge de.

Herwiha destnîşan kir: “Jinavbirina terorîst Ebû Îbrahîm El Qureyşî li vê navçeyê, ku Qureyşî gelek zirar gihandiye wê, ji aliyê xelkê Kurdistanê bi giştî û xwişk û birayên me yên Êzidî  bi taybetî, pêşwazî lê tê kirin. Jenosîd û karên têkder û wêrankariyên Qureyşî bi dawî hat. DAIŞ tûşî şikesteke din hat.”

Serokwezîr Mesrûr Barzanî diyar kir: “Ez ji Amerîka û Hevpeymaniya Navdewletî daxwaz dikim di programa rahênan û pirçekkirina hêzên Pêşmerge û artêşa Iraqê de berdewam bin. Hîn jî gefa vê grûpa terorîst bi dawî nebûye.”

The removal of the terrorist Abu Ibrahim al-Qurayshi from a region he did so much to harm is welcomed by our people and our Yazidi brothers and sisters in particular.

Qurayshi’s ruinous legacy of genocide and destruction has now ended. And ISIS has suffered another painful blow.

— Masrour Barzani (@masrour_barzani) February 3, 2022