Ji keleheke dêrîn ber bi paytexteke kesk: Nexşerêya nû ya geşedana Hewlêrê
Navenda Nûçeyan (K24) – Bajarê Hewlêrê ku yek ji kevintirîn bajarên cîhanê, niha dikeve qonaxeke nû ya geşedanê. Hikumeta Herêma Kurdistanê kar li ser sererastkirina masterplana bajêr dike, armanca vê plana stratejîk ew e ku Hewlêrê veguherîne modelekî pêşketina bajarvaniyê ku li hember guherîna keşûhewayê û kêmkirina karbonê bisekine.
Hewlêr: Ji berê heta niha
Nivîskar û rojnamevanê biezmûn Nazim Dilbend behsa Hewlêreke "bê şeqam, bê av û kêm keskatiyê" dike. Ew amaje bi wê yekê dike ku di salên şêstî yên sedsala borî de, çêkirina Rêya Şêst Metrî yekemîn gava mezin a berfirehbûna bajêr bû. Derbarê keskatiyê de jî, tenê çend deverên diyarkirî weke daristanên derdorê hebûn.
Guhertina Modela Bajarvaniyê
Li gorî masterplana nû, geşedana Hewlêrê dê ji şêweyê bazneyî yê navdar ê "tora pîrê", ku Keleha Hewlêrê navenda wê ye, derkeve û bêtir ber bi arasteyên xêzî (lîner) ve biçe:
- Arasteya Mûsil û Mexmûrê: Ev dever dê ber bi pîşesaziyê ve geşe bike.
- Arasteya Dihokê: Ji ber hebûna Ava Zêyê Mezin, ev dever dê ji bo niştecihbûnê guncawtir be.
- Arasteya Kerkûkê: Ev dever dê para şêr di warê keskatiyê de werbigire û bibe navçeyeke kesk a çir.
Ev guhertin dê alîkariyê bide dabeşkirineke hevseng a xizmetguzarî û çalakiyên aborî.
Dûrbîniya Pêşerojê
Serokê Şaredariya Hewlêrê Karzan Hadî dibêje: "Eger masterplana bajêr weke xwe were cîbicîkirin, heta sala 2050an dê guhertineke pir mezin di warê keskatiyê û avakirina jîngeheke tendurist de ji bo welatiyan û geştiyaran were dîtin."
Hadî herwiha amaje bi wê yekê dike, bi vê planê, dê giringî bi geşepêdana sektora geştiyariyê, parastina avên bin erdî, û avakirina binesaziyeke nûjen weke girêdana bajêr bi rêya trênê bi bajarên din ên Iraqê û welatên derve re were dayîn.
Hewlêr, ji dîwarên xwe yên dîrokî heta kemberên xwe yên kesk, nîşan daya ku dikare hevsengiyê di navbera parastina rabirdûyeke dewlemend û avakirina paşerojeke geş de ragire. Eger plan weke hatine danîn biser bikevin, Hewlêr dikare bibe yek ji bajarên herî çalak û pêşketî yên Rojhilata Navîn.
