Li Tirkiyeyê bihayê elektrîk û gaza sirûştî sedî 25 zêde bû

Navenda Nûçeyan (K24) – Desteya Rêkxistina Bazara Enerjiyê (EPDK) û saziya BOTAŞê ragihand, li Tirkiyeyê bihayê elektrîk û gaza sirûştî hatine zêdekirin. Ev biryar ji 4ê Nîsana 2026an pê ve dikeve warê cibicîkirinê.

EPDKê di daxuyaniya xwe de aşkere kir, ji ber zêdebûna lêçûnên hilberîn û belavkirinê, wan bihayê elektrîkê ji bo komên cuda yên aboneyan zêde kiriye. Li gorî bihayê nû:

- Aboneyên malan (niştecih): %25 hat zêdekirin.

- Sektora xizmetguzariyê (voltaja nizm): %17,5 hat zêdekirin.

- Aboneyên pîşesaziyê (voltaja navîn): %5,8 hat zêdekirin.

- Çalakiyên çandiniyê (çandinî): %24,8 hat zêdekirin.

Bi vê zêdebûnê re, aboneyekî malê ku mehane 100 kWh elektrîk bixebitîne, êdî dê di fatûreya xwe de 323,8 lîre bide.

Zêdebûna gaza sirûştî jî di asta %25 de ye

Li aliyê din, saziya BOTAŞê jî bihayên nû yên gaza sirûştî li ser malpera xwe ya fermî weşandin. Li gorî agahiyan:

- Bihayê gaza siruştî ji bo malan %25 zêde bû.

- Ji bo pîşesaziyê %18,61 zêde bû.

- Ji bo santralên hilberîna elektrîkê %19,42 zêde bû.

Ev zêdebûnên giran ku di her du çavkaniyên enerjiyê de di heman demê de hatine kirin, li Tirkiyeyê bû sedema fikarên nû yên krîza aborî û enflasyonê. Biryar ji îro 4ê Nîsanê pê ve di fatûreyên welatiyan de dê were nîşandan.