Daye Xan li Dihokê pirtûkxaneyek vekir: Temen ji bo xwendinê ne asteng e

Dihok (K24) – Daye Xan ku nişteciha bajarê Dihokê ye û ji malbata navdar a Botanî ye, xewna xwe ya zarokatiyê di şest saliyê de pêk anî. Daye Xan pirtûkxaneyek bi navê "Botanî" vekir û dixwaze hezkirina pirtûkan di nav ciwanan de zêde bike. 

Daye Xan ji malbateke rewşenbîr tê û her ji temenê xwe yê ciwan ve dildara xwendina pirtûkan bû. Ji bo wê, temen ti carî nebûye asteng daku li pey daxwazên xwe biçe. Niha ev du sal in ku pirtûkxaneya xwe vekiriye û rojane gelek saetan di nav pirtûkan de derbas dike.

Daye Xanê ku hevjîna nivîskar Ebdulfetah Botanî ye, gelek piştgirî ji aliyê malbata xwe ve dibîne. Malbata wê di birêvebirina pirtûkxaneyê de her gav alîkariya wê dike. Daye Xan diyar dike, ew wekî malbatekê bi hev re kar dikin daku karibin xizmeteke baştir pêşkêşî hezkiriyên wêjeyê bikin.

Armanca sereke ya Daye Xanê ji vekirina vê pirtûkxaneyê, ne tenê bazirganî ye. Ew dixwaze bibe sedemek daku ciwanên bajarê Dihokê bêtir berê xwe bidin xwendinê û çanda xwendina pirtûkan di civakê de xurt bibe.

Pirtûkxaneya "Botanî" niha bûye navendek ji bo rewşenbîr û pirtûkhezan, ku tê de Daye Xan bi dilgermî pêşwaziya mêvanên xwe dike û serpêhatiyên xwe yên xwendinê bi wan re parve dike.