Ji nava 180 welatan; 'Invest Kurdistan' xelata yekem a Kongreya Cîhanî ya Veberhênanê wegirt
Navenda Nûçeyan (K24) – Desteya Veberhênanê ya Herêma Kurdistanê bi rêya destpêşxeriya "Invest Kurdistan", di Lûtkeya Cîhanî ya Veberhênanê (AIM) de ku li Dubaiyê hat lidarxistin, xelata yekemîn wergirt. Herwiha hat ragihandin ku bi rêya projeyên veberhênana biyanî, zêdetirî 75 hezar derfetên kar ji bo ciwanên Kurdistanê hatine afirandin.
Rêvebera Marketîng û Hemahengiyê di yekeya "Invest Kurdistan" de, Îman Hişyar îro 7ê Îlona 2026an beşdarî bulteneke Kurdistan24ê bû û hûrgiliyên vê serkeftina navdewletî aşkere kirin.
Îman Hişyar diyar kir, Herêma Kurdistanê di nava pêşbaziyeke mezin de ku zêdetirî 180 welatên cîhanê beşdar bûn, karî xelata yekem a "Kongreya Salane ya Veberhênanê" li Îmaratê bi dest bixe. Ev serkeftin piştî wê yekê hat ku Desteya Veberhênanê projeyeke pîşesazî ya veberhênerekî Îmaratî, ku sala borî li Kurdistanê destûra kar wergirtibû, pêşkêşî kongreyê kir. Projeya navborî di asta cîhanî de di kategoriya projeyên navdewletî de bû yekem.
Nûnerên Kurdistanê di merasîma wergirtina xelatê de bi cilûbergên kurdî û bi bilindkirina Ala Kurdistanê amade bûn, ku vê yekê baleke mezin kişand.
Derbarê stratejiya Hikûmeta Herêma Kurdistanê ya ji bo rakêşana sermayeya biyanî, Îman Hişyar destnîşan kir ku li gorî karnameya Kabîneya Nehem bi serokatiya Mesrûr Barzanî, çend sektorên sereke hatine diyarkirin, sektora çandiniyê di pêşîneyê de, piştre jî sektora geştyariyê, teknolojî û hişê destkird (AI) û pîşesazî tên.
Hişyar herwiha got: "Axa Kurdistanê berekêt e û xwezaya wê ji bo veberhênanê guncav e, lewma veberhênên biyanî bi germî berê xwe didin derfetên çandinî û geştiyariyê."
Rêvebera Marketîngê aşkere kir, bi rêya van projeyên veberhênanê, heta niha nêzîkî 75 hezar derfetên kar ên rasterast ji bo ganjên Kurdistanê û hêza kar a navxweyî hatine peyda kirin.
Di dawiyê de hat destnîşankirin ku aramiya siyasî û ewlehiya Herêma Kurdistanê di navçeya Rojhilata Navîn de, hiştiye ku Herêm bibe navendeke ewle û pêbawer ji bo kompaniyên mezin ên cîhanî. Armanca sereke ew e ku Kurdistan bibe dergehekî sereke yê bazirganî û avedaniyê ji bo tevahiya navçeyê.