پیت هێگسێت: دەبێت عێراق گرووپە چەکدارەکان چەک بکات

ئەمڕۆ چوارشەممە، 15ـی تەممووزی 2026، وەزیری جەنگی ئەمریکا، پیت هێگسێت، داوای لە حکوومەتی عێراق کرد, سەروەریی وڵاتەکەی بسەلمێنێت لەڕێگەی داماڵینی چەکی ئەو گرووپە چەکدارانەی کە لایەنگری ئێرانن، هەروەها حکوومەتی عێراقی بە بەرپرسیار دانا لە بەرامبەر سەدان هێرش کە کراونەتە سەر هێزەکانی ئەمریکا.

وەزیری جەنگی ئەمریکا، پیت هێگسێت لە دوای کۆبوونەوەی لەگەڵ سەرۆک وەزیرانی عێراق، عەلی زەیدی، کە لە بارەگای وەزارەتی جەنگی ئەمریکا لە واشنتن بەڕێوەچوو، لە پلاتفۆڕمی ئێکس رایگەیاند "گرووپە چەکدارە عێراقییەکانی لایەنگری ئێران، بەرپرسیارن لە ئەنجامدانی زیاتر لە 600 هێرش بۆ سەر ئەمریکییەکان."

سەبارەت بە لایەنی ئەمنییەوە، وەزیری جەنگی ئەمریکا جەختی کردەوە، هێزە ئەمنییەکانی عێراق و هێزەکانی پێشمەرگە، سەرکردایەتی هه‌وڵه‌کانی تێکشکاندنی رێکخراوی داعش دەکەن. ئەمەش دوای کشانەوەی هێزەکانی هاوپەیمانی نێودەوڵەتی بە سەرکردایەتی ئەمریکا لە عێراق دێت، کە بڕیارە لە ئەیلوولی داهاتوودا جێبەجێ بکرێت.

سێشەممە، 14ـی تەممووزی 2026، عەلی زەیدی، سەرۆکوەزیرانی عێراق لە کۆشکی سپی لەگەڵ دۆناڵد ترەمپ، سەرۆکی ئەمریکا کۆبووەوە. لە کۆنگرەیەکی رۆژنامەوانیدا زەیدی رایگەیاند "ئەمە یەکەمین سەردانمە بۆ ئەمریکا و سەردانێکی ئاسایی نییە، بەڵکو بۆ راگەیاندنی هاوبەشییەکی ستراتیژیی ئابوورییە. لەگەڵ سەرۆک ترەمپ رێککەوتووین کە لە 30ـی ئەیلوول هێزەکانی ئەمریکا لە عێراق بکشێنەوە."

سەرۆکوەزیرانی عێراق ئاماژەی بەوەش دا، عێراق چاوی لە پەیوەندییەکی قووڵی ئابوورییە و دەرگا بۆ هاتنی کۆمپانیا ئەمریکییەکان کراوەیە. گوتیشی "سڵاوی کۆنترین شارستانی جیهان بە گەورەترین ناوەندی ئابووری جیهان دەگەیەنم، ئێمە دەمانەوێت پەیوەندییەکانمان لە چوارچێوەی ئەمنییەوە بۆ پەیوەندییەکی بەهێزی ئابووری بگۆڕین."

لە وەڵامی پرسیارێکی رەحیم رەشیدی، پەیامنێری کوردستان24، سەبارەت بە پێگەی هەرێمی کوردستان، عەلی زەیدی گوتی "کوردستان بەشێکی گرنگە لە عێراق و هەموو پارچەیەکی ئەم وڵاتە وەک بەشێک لە جەستەی من وایە، هیچ جیاوازییەک لە نێوان ناوچەکاندا ناکەم."

زەیدی لە کۆتایی قسەکانیدا ستایشی پێگەی ئەمریکای کرد وەک وڵاتێکی سەنگین و گرنگترین هاوبەشی ستراتیژیی عێراق و دووپاتی کردەوە کە ئەنجامی ئەم سەردانە بۆ داهاتووی عێراق پڕبایەخ دەبێت.

هاوکات دۆناڵد ترەمپ، سەرۆکی ئەمریکا، لە وەڵامی پرسیارێکی رەحیم رەشیدی، پەیامنێری کوردستان24 لە واشنتن، رایگەیاند "ئێمە لەگەڵ حکوومەتی بەغدا خەریکی کارکردنێکی یەکجار باش و هاوبەشین. عێراق بەهۆی سامانی نەوتەکەیەوە خاوەنی توانایەکی یەکجار گەورەیە و ئێمە چەندین رێککەوتنی ستراتیژی واژۆ دەکەین کە دەبنە هۆی زیادبوونی ئاستی بەرهەمهێنانی نەوت و رەخساندنی دەرفەتی کاری زۆر بۆ هەردوو وڵات."