HDP daxwaza bicihkirina biryara Dadgeha Mafên Mirovan ya Ewropayê dike
Şandeke HDPê li Zîndana Edîrneyê serdana Selahedîn Demîrtaş kir.
Navenda Nûçeyan (K24) – Şandeke HDPê li Zîndana Edîrneyê serdana Selahedîn Demîrtaş kir û daxwaza cîbicîkirina biryara Dadgeha Mafên Mirovan ya Ewropayê kirin.
Peyvdara Meclîsa Jinan ya HDPê Ayşe Acar Başaran û Cîgirê Serokê Fraksiyona HDPê Saruhan Oluç, li Zîndana Edîrneyê çûn serdana Hevserokê Berê yê HDPê Selahedîn Demîrtaş û parlamenterê berê Ebdula Zeydan.
Nivîsîngiha Rojnamevanî ya HDPê da xuyakirin, di civînê de pêdiviya demokratîkbûna Tirkiyeyê û serdestiya mafnasiyê hatiye nirxandin û bang li aliyên demokratîk hatiye kirin ku helwestên xwe bikin yek.
Şanda HDPê bang li desthilatê jî dike ku biryara Dadgeha Mafên Mirovan ya Ewropa cîbicî bike û Demîrtaş di zûtirîn dem de azad bike.
Dadgeha Mafên Mirovan a Ewropayê (DMME) berî çend rojan aşkere kiribû, zindanîkirina Selahatin Demirtaş li dijî pênc madeyên Peymana Mafên Mirovan a Ewropayê ye û divê Demirtaş demildest were berdan.