Nêçîrvan Barzanî roja hilbijartinên Parlamentoya Kurdistanê diyar kir
Serokê Herêma Kurdistanê Nêçîrvan Barzanî biryara diyarkirina roja hilbijartinên Parlamentoya Kurdistanê îmze kir.
Hewlêr (K24) – Serokê Herêma Kurdistanê Nêçîrvan Barzanî biryara diyarkirina roja hilbijartinên Parlamentoya Kurdistanê îmze kir û roja 1/10/2022yan ji bo encamdana hilbijartinan hat diyarkirin.
Şêwirmendê Bilind ê Serokê Herêma Kurdistanê Dilşad Şehab ji K24ê re ragihand; îro Nêçîrvan Barzanî biryara diyarkirina roja hilbijartinan a Parlamentoya Kurdistanê îmze kir û li gor biryarê, roja 1ê Cotmeha 2022yan ji bo encamdana hilbijartinên gera şeşem a parlamentoyê hat diyarkirin.
Li ser malpera Serokatiya Herêma Kurdistanê jî hat ragihandin: “Îro pênçşemê 24.02.2022 Serokê Herêma Kurdistanê Nêçîrvan Barzanî, fermana herêmî ya destnîşankirina roja hilbijartina giştî ya Parlementoya Herêma Kurdistana Iraqê wajo kir.”
Herwiha hat eşkerekirin: “Di fermana herêmî de hatiye ku li gor yasaya hejmara yek ya sala 2005, yasaya Serokayetiya Herêma Kurdistana Iraqê, hemwarkirî, roja 01.10.2022 wekî roja encamdana xula şeşema hilbijartina Parlamentoya Kurdistanê hate destnîşankirin.”
Di dawiya daxuyaniyê de hatiye eşkerekirin: “Her li gor fermanê pêwîst e aliyên peywendîdar ên wekî Parlamento û Hikûmet û Komîsyona Bilind a Serbixwe ya Hilbijartinan a Herêma Kurdistanê, dest bi rêkarên pêwîst yên ji bo birêveçûna proseyê bikin.”