Mesrûr Barzanî: Em hêvîdar in di demeke kurt de hikûmetê pêk bînin
Navenda Nûçeyan (K24) - Serokê Hikûmeta Herêma Kurdistanê hêvîdar e heta dawiya vê mehê hikûmeta nû bê pêkanîn û dibêje, “Silêmanî bajarê me ye.”
Serokê Hikûmeta Herêma Kurdistanê Mesrûr Barzanî seet 02:15 ê piştî nîvroya îro (Çarşem, 16.04.2025) gehişt Zanîngeha Amerîkayî ya Silêmaniyê û tevlî Gera Nehê ya Dîdara Silêmaniyê dibe.
Serokwezîrê Herêma Kurdistanê dema gehişt zanîngeha Amerîkayî ya Silêmaniyê, di daxuyaniyeke rojnamevanî de got, “Me rêz û silav ji bo Silêmaniyê hene, bajarê me ye.”
Mesrûr Barzanî di bersiva pirsyarekê de ka îro li Dîdara Silêmaniyê behsa çi dike got, “Ez nizanim, li dû pirsyaran dimîne. Ez nizanim pirsyar dê çawa bin.”
Navbirî ku di eynî demê de Cîgirê Serokê Partiya Demokrat a Kurdistanê ye jî li ser danûstandinên PDK û YNKê ji bo pêkanîna hikûmeta nû ragehand, “Spas ji Xudê re niha danûstandinên PDK û YNKê baş bi rê ve diçin, lê em hêvîdar in ku em bikarin di demeke kurt de hikûmetê pêk bînin. Êdî em li bendê ne.”
Di bersiva pirsyara rojnamevanekî de ka gelo heta dawiya vê mehê hikûmeta nû tê pêkanîn an ne, Serokwezîrê Herêma Kurdistanê got: Hêvîdar im.
Bi tevlîbûna hejmareke berpirsên navxweyî û navneteweyî, Gera Nehê ya Dîdara Silêmaniyê îro (Çarşem, 16.04.2025) li Zanîngeha Amerîkayî ya Silêmaniyê dest pê dike û heta sibe (Pêncşem, 17.04.2025) berdewam dibe.
Tewerê serekî yê Dîdara Silêmaniyê ya îsal “gengeşekirina aştiya deverê” ye û bi hevahengiya Peymangeha “Chatham House”ê ya Îtalyayî ya Karûbarên Navneteweyî, Peymangeha Îsam Farisê ya Zanîngeha Amerîkayî ya Beyrûtê, Dezgeha Sedeyê û Koma Kirîzên Navneteweyî tê lidarxistin.
Li dû karnameyê wê dîdarê, Serokê Hikûmeta Herêma Kurdistanê Mesrûr Barzanî jî seet 03:00 heta 03:30 ê îro (Çarşem, 16.04.2025) tevlî danûstandineke taybet dibe.
Li dû wê karnameya hatiye parvekirin, hin ji kesên tevlî wê dîdarê dibin ev in:
1. Serokê Komara Îraqê Letîf Reşîd
2. Serokwezîrê Îraqê Mihemed Şiya Sûdanî
3. Serokê Herêma Kurdistanê Nêçîrvan Barzanî
4. Serokwezîrê Herêma Kurdistanê Mesrûr Barzanî
5. Cîgirê Serokwezîrê Herêma Kurdistanê Qubad Talebanî
6. Wezîrê Navxwe yê Hikûmeta Herêma Kurdistanê Rêber Ehmed
7. Serokê Yekîtiya Niştîmanî ya Kurdistanê Bafil Talebanî
8. Endamê Mekteba Siyasî ya Partiya Demokrat a Kurdstanê Hoşyar Zêbarî
9. Serokê Tevgera Hîkmeyê ya Niştîmanî ya Îraqê Emar Hekîm
10. Damezrînerê Zanîngeha Amerîkayî ya Silêmaniyê Berhem Salih
11. Wezîrê Petrolê yê Îraqê Heyan Ebdilxenî
12. Nûnerê Taybet ê Sikirtêrê Giştî yê Neteweyên Yekgirtî li Îraqê Mihemed Hesan
13. Patiryark û Serokê Kenîseya Kildanan li Îraq û Cîhanê Kardînal Lwîs Sako
14. Cîgirê Wezîrê Derve yê Îranê Seîd Xetîpzade
15. Alîkara Berê ya Weîzrê derve yê Amerîkayê Barbara Leaf
Dîdara Silêmaniyê ji sala 2013ê ve li Zanîngeha Amerîkayî ya Silêmaniyê tê lidarxistin û tê çaverêkirin ku îsal, di hejmareke panel û danûstandinên taybet de danûstandin li ser van pirsan bên kirin:
1. Rewşa Îraq û deverê bi awayekî giştî.
2. Danûstandinên Amerîka û Îranê.
3. Şerê Xezzeyê û şerê Ukraynayê.
4. Hilbijartinên bên ên Civata Nûnerên Îraqê.
5. Pêkanîna Hikûmeta Herêma Kurdistanê.
6. Çarenivîsa Rojavayê Kurdistanê û rewşa Sûriyeyê.
7. Piroseya nû ya aştiyê li Bakurê Kurdistanê û Tirkiyeyê.