Berdevkê APIKUR'ê: Pêwîst e hikûmeta Iraqê kompaniyan biparêze

Navenda Nûçeyan (K24) – Berdevkê Komeleya Pîşesaziya Petrola Kurdistanê (APIKUR), Myles Caggins, ragihand ku endamên APIKUR'ê bi tundî êrişên bi dronan ên li ser binesaziya Herêma Kurdistanê şermezar dikin û tekez kir ku parastina kompaniyan erkê Hikûmeta Federal a Iraqê ye.

Myles Caggins îro 15ê Tîrmehê di dema beşdarbûna xwe ya di bernameya "Basi Roj" a Kurdistan24 de, got: "Em li benda lêkolînên Hikûmeta Iraqê ne derbarê êrişan de. Kompanî di her şert û mercî de li ser karê xwe berdewam bûne û pêwîst e ku awayê wergirtina mafên me yên darayî zelal bibe."

Caggins da zanîn, ew li bendê ne di çend hefteyên bê de hinardekirina petrolê ji nû ve dest pê bike û got: "Pêwîst e bi nivîskî piştrastî ji me re bê dayîn. Em bang li hemû aliyan dikin ku pirsgirêkê çareser bikin."

Berdevkê APIKUR'ê herwiha diyar kir, komeleya wan xala 12'an a yasaya budceya Iraqê qebûl dike û da zanîn ku ger rêkeftin were kirin, di nava çend rojan de ew dikarin dest bi hinardekirina petrolê bikin.

Myles Caggins got jî: "Nîşaneyên ji bo çareserkirina pirsgirêkan erênî ne. Me di civînên xwe yên ligel Hikûmeta Herêmê û Hikûmeta Iraqê de ragihandiye ku em ji bo hinardekirinê amade ne, lê li gorî mercên ku me hene. Em niha bi Hikûmeta Iraqê re di nava gotûbêjan de ne."