Netanyahu: Nabe ti hikûmetek bi tevlîbûna lîsteyên Erebî bê avakirin

Navenda Nûçeyan (K24) – Serokwezîrê Îsraîlê Benjamin Netanyahu tekez kir ku nabe ti hikûmetek bi tevlîbûn û hevpeymaniya ligel lîsteyên Erebî bê avakirin, ev jî di demekê de ye ku ne bereya Netanyahu û ne jî bereya opozîsiyonê nekarî hejmara kursiyên pêdivî bo avakirina hikûmetê bi dest bixin.

Serokwezîrê Îsraîlê Benjamin Netanyahu îro În, 30ê Cotmeha 2026ê, ragihand ku nabe bi ti awayekî ti aliyek bi merema avakirina hikûmetê ligel Erebên Îsraîlê hevpeymaniyê pêk bîne.

Ev gotinên Netanyahu di demekê de ne ku Serokê Partiya Demokratên Çepgirên Lîbral Yair Golan ragihand ku ligel Gadi Eizenkot ê diyarîtrîn hevrikê Benjamin Netanyahu civiyaye. Golan piştî wê civînê li ser tora civakî ya "X"ê nivîsî: "Rizgarkirina Îsraîlê di metirsiyê de ye."

Golan amaje bi wê yekê jî kir ku ligel Serokê Partiya Lîsteya Erebî ya Yekgirtî (Ra'am) Mansour Abbas û Serokê berê yê opozîsiyonê Yair Lapid civiyaye û tekez kir ku xwestiye hemî bijardeyan biceribîne û ligel hemî hevparan bixebite.

Golan herwesa daxwaza avakirina hevpeymaniyê ligel partiyên Erebî kir, ku di hilbijartinan de serkeftineke mezin bi dest xistiye û nêzîkî 19 kursiyên Knesetê misoger kirine, ku dikarin bo diyarkirina bereya serketî bibin yekalîker. Lê partiyên din ên opozîsiyonê heta niha ev pêşniyar red kiriye.

Hilbijartinên Îsraîlê li roja Sêşemê hatin kirin û li roja Pêncşemê bi dawî hatin, lê ne Netanyahu û ne jî bereya opozîsiyonê bi serokatiya Eizenkot nekarîn piraniya parlamentoyê misoger bikin û bo avakirina hikûmetê jî pêdivîtiya wan bi avakirina hevpeymaniyê ligel partiyên din heye, ku piraniya kursiyan hene. Piştî partiya Netanyahu û opozîsiyonê, hevpeymaniya Ereban tê.