Kiliçdaroglu: Divê Tirkiye bibe garantorê Kurdan
Navenda Nûçeyan (K24) – Serokê Partiya Gel a Komarî ya Tirkiyeyê (CHP) Kemal Kiliçdaroglu ragihand, tevî hin nîgeraniyên destpêkê yên derbarê radestkirina temamî ya çekên PKKê de, niha pêvajoya aştiyê bi awayekî tendurist birêve diçe.
Kemal Kiliçdaroglu di hevdîtinekê ligel hejmarek rojnamevanan de, behsa pêvajoya çekdanîna Partiya Karkerên Kurdistanê (PKK) kir û amaje bi wê yekê kir ku di destpêkê de hin nîgeraniyên wan hebûne ka gelo hemû çek hatine radestkirin an beşek ji wan tên veşartin.
Kiliçdaroglu da zanîn ku di demên dawî de di axaftineke ligel kesekî de ew nîgeraniyên wan ji holê hatine rakirin û jê re hatiye ragihandin ku ev pirs dê bi temamî bê çareserkirin. Herwiha diyar kir, eger bûyereke neasayî rû nede, ew di wê baweriyê de ye ku sîstem û pêvajo bi awayekî tendurist birêve diçin.
Derbarê pêwendiyên wan ên ligel Kurdên herêmê de, Serokê CHPê aşkere kir ku êdî ti pirsgirêkeke wan bi Kurdan re nîne, lê berûvajî wê ew di wê baweriyê de ye ku di dema her zextekê de li herêmê, pêwîst e Tirkiye bibe garantorê Kurdan. Kiliçdaroglu herwiha anî ziman ku divê Kurd jî hest bi wê yekê bikin û bibêjin: "Garantorê me Dewleta Komara Tirkiyeyê ye."
Serokê CHPê xwast ku bi rêya hêza çandî û hevkariya aborî serederî ligel herêmê bê kirin û karsaz ji bo avakirina kargehan bên handan. Tekez kir jî ku pêwîst e kar ji bo wê yekê bê kirin ku xelkê herdu aliyan bi hev re kar bikin, dibistanên hunerî bên vekirin û huner û çand bên pêşxistin da ku herêm bihêz bibe.
Daxuyaniyên Kiliçdaroglu piştî wê yekê tên ku di 10ê Mijdara 2026an de Serokê Parlamentoya Tirkiyeyê li parlamentoyê serdana Serokê CHPê kiribû, ji bo şêwirmendiya li ser avakirina komîsyona çavdêriya parlamentoyê di çarçoveya pêvajoya "Tirkiyeya Bêteror" de.
Beriya niha jî Parlamentoya Tirkiyeyê di 10ê Tebaxa 2026an de bi dengê 467 parlamenteran û li ser bingeha raporeke ku bi dengê 47 ji 50 endamên komîsyoneke parlamentoyê hatibû pesendkirin, "Yasaya Bihêzkirina Hevdengiya Niştimanî û Yekgirtina Civakî" pesend kiribû. Mercê sereke yê cîbicîkirina wê yasayê jî çekdanîna temamî, hilweşandina PKKê û paşxistina cezayên yasayî ye ji bo dema pênc heta 10 salan.
Herwiha di Tebaxa 2026an de Kiliçdaroglu nexşerêyeke çaralî ji bo çareserkirina pêvajoyê pêşkêş kiribû, ku tê de tekezî li ser çekdanîna rasteqîn û çavdêrîkirî, çaksaziya yasayî, rêkxistina ewlehiya herêmî ya girêdayî Iraq û Sûriyeyê û parastina yekparçeyiya Tirkiyeyê kiribû. Di 6ê Mijdara 2026an de jî hêviya serkeftinê ji bo pêvajoyê xwestibû da ku aramî vegere herêmê.