PDK û UNAMI li ser piroseya hilbijartinên Perlemana Kurdistanê dicivin
Navenda Nûçeyan (K24) - Şandeke bilind a PDKyê û şandeke Neteweyên Yekgirtî li ser nerîn û têbîniyan ji bo hilbijartinên Perlemana Kurdistanê dicivin.
Şandeke PDKyê ku ji endamên Mekteba Siyasî ya PDKyê Hêmin Hewramanî û Amîna Zikrî û Cehfer Êmînkî û endamên pişka hilbijartinan a Mekteba Siyasî pêk hatibû îro (Yekşem, 07ê NÎsana 2024ê) bi şandeke UNAMI ya bi serokatiya Cîgirê Nûnera Taybet a Sikirtêra Gişrî ya Neteweyên Yekgirtî li Îraqê Claudio Cordone re civiya.
Hêmin Hewramanî li ser tora civakî ya Facebookê ragehandibû, “Ew civîn li ser pêşniyara Nûnera Taybet a Sikirtêrê Giştî yê Neteweyên Yekgirtî li Îraqê Jeanine Hennis-Plasschaert bû ku di dawî serdana xwe ya ji bo Herêma kurdistanê û civînên xwe yên bi Serok Barzanî û Serokê Herêma Kurdistanê û Serokê Hikûmeta Herêma Kurdistanê re pêşniyar kiribû, ku daxwaz kir şandeke şareza û teknîkî ya UNAMIyê serdana Hewlêrê bike û bi şandeke PDKyê re li ser dîtin û nerîn û têbîniyên PDKyê ji bo hilbijartinên Perlemana Kurdistanê danûstandinan bike.
Di wê rûniştinê de, şanda UNAMIyê tekez li ser giringiya piroseya hilbijartinan bi awayekî ku cihê baweriya tev aliyan be û tevlîbûna hemî aliyan kir û ragehand ku ji bo haydarbûna ji hûrkariyên dîtin û nerîn û têbîniyên PDKyê dilgerm in.
Hêmin Hewramanî nivîsiye, “Me wekî şanda PDKyê ron kir UNAMI şahida wê yekê ye ku ew du sal bûn PDKyê daxwaza hilbijartinan dikir û pabendî piroseya hilbijartinan bû û çar caran Serokê Herêma Kurdistanê mersûm jî derxist û hin aliyên din rêgir bûn û nedihişt rûniştinên perlemanê ji bo danûstandinên li ser reşnivîsa edilandina qanûna hilbijartinan pêk bûn û her ji destpêkê ve dijî karkirina komisyonê bûn”.
Hêmin Hewramanî tekez li ser helwesta PDKyê kiriye û amaje daye, “Me ji wan re ron kir ku PDK niha jî ji bo hilbijartinan amade ye, bi şertekî ku dûrî dîzaynên pêşwext be û divê UNAMI ji bo çarekirina arêşeyên teknîkî û gerentîkirina pakijî û zelaliya tevaya wê piroseyê li ser xetê be û dûrî wê amadekariya pêşwext be ya ku hin aliyên navxweyî û derve ji bo dîzaynkirina kursiyên PDKyê û îradeya dengderan bername jê re hatiye danan”.
Mekteba Siyasî ya PDKyê roja Duşemê, 18.03.2024, beyannameyek li ser rewşa niha ya Îraqê, peywendiyên Hewlêr û Bexdayê, hilbijartinên Perlemana Kurdistanê, biryarên Dadgeha Federalî û çend pirsên din belav kir û tê de ragehand, “Em wekî berjewenda gel û welatê xwe dibînin ku partiya me neçe bin barê pejirandina biryara nedestûrî û sîstemeka sepandî ji derveyê îradeya gelê Herêma Kurdistanê û dezgehên wê yên destûrî û tevlî wan hilbijartinan nebe ku bi awayekî neqanûnî û nedestûrî û li jêr sîbera sîstemeka sepandî bên kirin”.
Serokê Herêma Kurdistanê Nêçîrvan Barzanî roja Yekşemê, 03.03.2024, di merasîmekê de roja 10.06.2024ê wekî jivanê birêveçûna hilbijartinên gera şeşê ya Perlemana Kurdistanê diyar kir.
