Bruksel: Kurdên dîasporayê bi muzîk û zimanê dayikê nasnameya xwe diparêzin
Bruksel (K24) – Navenda Revenda Kurdistanî li Bruksela paytexta Belcîkayê, ji bo kurdên li dîasporayê xulên fêrbûna tembûrê û zimanê kurdî dan destpêkirin. Armanca van xulan parastina çand, huner û nasnameya kurdî ye di nava nifşên nû de.
Muzîka kurdî li dîasporayê ne tenê hunerek e, lê wekî zimanê dil û dîrokeke zindî tê dîtin. Ji ber vê yekê, Navenda Revenda Kurdistanî li Brukselê derî li ber hezkiriyên hunerê vekirine, da ku amûrên muzîkê yên kurdî, bi taybetî tembûrê nas bikin û fêrî jenîna wê bibin.
Xwendekarên ku ji parçeyên cuda yên Kurdistanê beşdarî xulê bûne, armanca xwe bi hezkirineke mezin tînin ziman. Yasemîn Hesen, xwendekareke ji Efrîna Rojavayê Kurdistanê, diyar kir ku ew ji bo fêrbûna tembûrê li wir e û got:
"Ez li vir im da ku mîrateya me ya kurdî ji bîr nebe. Ez dixwazim fêrî tembûrê bibim da ku di pêşerojê de fêrî zarokên xwe jî bikim."
Herwiha Avêsta Salihî, ku xelka Urmiya Rojhilatê Kurdistanê ye, aşkere kir ku hezkirina wê ya ji bo çand û kultura kurdî ew ber bi vê navendê ve aniye:
"Ez ji çand û muzîka xwe pir hez dikim. Ez hatime ku tevî hevalên xwe fêrî tembûrê bibim û di pêşerojê de bikaribim bi kurdî muzîkê bijenim."
Berpirs û mamosteyê xulê Yilmaz Guney bal kişand ser giringiya perwerdehiya çandî li Ewropayê. Guney destnîşan kir ku ev ne tenê xuleke muzîkê ye, lê di heman demê de xebateke neteweyî ye.
Berpirsê Navenda Diasporaya Kurdistanê li Brûkselê Mistefa Şakir jî got: "Îro xula me ya duyemîn a muzîkê dest pê kir. Di heman demê de em perwerdehiya zimanê kurdî jî didin. Ji ber ku xwendekarên me ji her çar parçeyên Kurdistanê ne, ev der dibe cihê têkiliya ziman û çandê. Bo me gelek giring e ku li dilê Ewropayê, li Brukselê, em çanda xwe bidin naskirin û biparêzin."
Berpirsên navendê bang li hemû kurdên li Belçîkayê dikin ku bi malbat û zarokên xwe re beşdarî van xulan bibin. Xulên muzîk û ziman hem ji bo zarokan û hem jî ji bo mezinan hatine amadekirin. Bi vî awayî, Navenda Revenda Kurdistanî hewl dide nasnameya kurdî li derveyî welat zindî bihêle û wekî deryakekê li ber hunera kurdî bimîne.