بە خواردنی هەنار، یادەوەریت بەهێز بکە و دڵت بپارێزە
میوەی هەنار، ناسراوە بە ڤیتامین، کانزا و دژەئۆکسێنەرەکانە کە چەندان سوودی بۆ تەندروستیی مرۆڤ هەیە. بەپێی توێژینەوە زانستییەکان، خواردنی هەنار دەتوانێت ڕۆڵێکی گرنگ ببینێت لە پاراستنی دڵ، پێست، یادەوەری و تەنانەت خۆپاراستن لە نەخۆشییە مەترسیدارەکان.
هەنار دەوڵەمەندە بە ماددەی دژەهەوکردنی بەهێز، بەتایبەتی پێکهاتەی "یورۆلیتین" (Urolithins) کە لە ئەنجامی گۆڕانی تۆو و توێکڵی هەنار لەناو جەستەدا دروست دەبێت. ئەم تایبەتمەندییە یارمەتی کەمکردنەوەی نیشانەکانی هەوکردن دەدات، کە هۆکاری سەرەکیی نەخۆشییەکانی دڵ، شەکرەی جۆری دوو و شێرپەنجەن. هەروەها ئاوسان و ئازاری جومگەکان کەمدەکاتەوە و لە پووکانەوەی ئێسک دەتپارێزێت.
پاراستنی تەندروستیی دڵ:
خواردنەوەی ڕۆژانەی شەربەتی هەنار یارمەتی دابەزاندنی پەستانی خوێن و کەمکردنەوەی ئاستی کۆلیسترۆڵی زیانبەخش (LDL) دەدات، کە دوو هۆکاری سەرەکیی نەخۆشییەکانی دڵن.
بەهێزکردنی یادەوەری و پاراستنی مێشک:
دژەئۆکسێنەرەکانی ناو هەنار فشاری ئۆکسیداتیڤ لە مێشکدا کەمدەکەنەوە. توێژینەوەکان دەریانخستووە کە ئەمە یارمەتی پاراستن لە نەخۆشیی ئەلزەهایمەر دەدات و پشتگیری لە یادەوەریی کورتخایەن و درێژخایەن دەکات.
خۆپاراستن لە شێرپەنجە:
تۆوی هەنار تایبەتمەندی دژەهەوکردنی هەیە و دەتوانێت گەشە و بڵاوبوونەوەی خانە شێرپەنجەییەکان خاو بکاتەوە، بەتایبەتی لە قۆناغە سەرەتاییەکانی هەندێک جۆری شێرپەنجەدا.
پاراستنی تەندروستیی پێست:
توێژینەوەیەک دەریخستووە خواردنەوەی شەربەتی هەنار بۆ ماوەی 12هەفتە، توانای پێست بۆ بەرگریکردن لە تیشکی زیانبەخشی سەروو بنەوشەیی (UV) زیاد دەکات، بەمەش لە پیربوونی پێشوەختە و شێرپەنجەی پێست دەتپارێزێت.
پشتگیریکردنی کۆئەندامی هەرس:
هەنار یارمەتی گەشەی بەکتریا سوودبەخشەکانی ناو ڕیخۆڵە دەدات، کە بۆ کرداری هەرسکردن گرنگن و ڕەنگە لە هەندێک نەخۆشیی کۆئەندامی هەرس بتپارێزن.
سەرەڕای ئەم هەموو سوودە، پێویستە هەندێک کەس ئاگاداری خواردنی هەنار بن: بەتایبەت ئەوانەی دەرمانی دابەزاندنی کۆلیسترۆڵ، دژە گەشکە، ڕێکخستنی لێدانی دڵ، یان دابەزاندنی پەستانی خوێن بەکاردەهێنن، دەبێت ئاگاداربن، چونکە هەنار ڕەنگە کارلێک لەگەڵ ئەم دەرمانانەدا بکات و کاریگەرییان بگۆڕێت. بەهۆی بوونی ڕێژەیەکی بەرزی شەکر و کاربۆهیدرات لە تۆوی هەناردا، پێویستە نەخۆشانی شەکرە بە ڕێژەیەکی کەم بیخۆن. هەروەها ئەگەر کێشەی وەک سکچوونت هەیە، باشترە خۆت لە خواردنی هەنار بەدوور بگریت تا دۆخەکەت باشتر دەبێتەوە.
