دۆناڵد ترەمپ لە پەیامێکدا کە لە هەژماری خۆی لە "Truth Social" بڵاوی کردووەتەوە، بە فەرمی کوژرانی ڕێبەری باڵای ئێرانی راگەیاند و جەختی کردەوە کە لە هێرشێکی وردی هەواڵگریی هاوبەش لەگەڵ ئیسرائیلدا توانیویانە خامنەیی و چەندین سەرکردەی دیکەی ئەو وڵاتە لەناو ببەن، هاوکات هۆشداریی کۆتاییشی دایە هێزە چەکدارەکانی ئێران بۆ ئەوەی خۆیان ڕادەست بکەن.

 راشیگەیاند، هێرشەکانمان بەردەوام دەبن.

بنیامین ناتانیاهۆ، سەرۆکوەزیرانی ئیسرائیل لەبارەی بە جەنگی ئێرانەوە لە تازەترین لێدوانیدا گوتی: لە جەنگێکی چارەنووسسازداین بۆ لەناوبردنی هەڕەشەکانی کۆماری ئیسلامیی ئێران.

هاوکات جەختی لەوە کردەوە کە لە ئۆپەراسیۆنەکانی ئەمڕۆدا هێرشیانکردووەتە سەر ناوەندی ئێران و ژمارەیەکی زۆر لە فەرماندەکانی سوپای پاسدارانیان کردووەتە ئامانج.

ئاشکراشی کرد، کە پلانی هێرشەکانی ئیسرائیل بەردەوام دەبێت و لە رۆژانی داهاتوودا سەدان پێگەی دیکە لە ناوجەرگەی ئێران دەکەنەوە ئامانج. 

دۆناڵد ترەمپ سەرۆکی ئەمریکا دەڵێت "سیناریۆی جیاوازمان لەبەردەستدایە بۆ بەڕێوەبردنی جەنگەکە، یەکێکیان دەستبەسەرداگرتنی هەموو شتێکە، ئەوی دیکەشیان کۆتاییهێنانە بە جەنگە لە ماوەی چەند رۆژێکدا".

ترەمپ بۆ کەناڵی 12 ئیسرائیلی، پەردەی لەسەر هۆکارەکانی شکستھێنانی هەوڵە دیپلۆماسییەکان و ستراتیژیی ئێستای ئەمریکا بەرانبەر ئێران هەڵدایەوە.

سەرۆکی ئەمریکا ئاشکرای کرد، کە ئێران چەندینجار زۆر نزیکبووەتەوە لە گەیشتن بە رێککەوتن، بەڵام لە دواساتدا پاشەکشەی کردووە.

وەزارەتی دەرەوەی عێراق، بۆردومانکردنی ناوچەکانی ناوەڕاستی عێراق و هەرێمی کوردستانی سەرکۆنە دەکات و بە هەوڵێکی مەترسیدار بۆ راکێشانی بەغدا بۆ ناو "ئاگر و ناوجەرگەی جەنگ" وەسفی دەکات، هاوکات پشتیوانیی خۆی بۆ چارەسەری ئاشتییانە دووپات دەکاتەوە.

ئەمڕۆ شەممە، 28ـی شوباتی 2026، دۆناڵد ترەمپ، سەرۆکی ویلایەتە یەکگرتووەکانی ئەمریکا لە پەیامێکی ڤیدیۆییدا رایگەیاند، هێزەکانیان دەستیان بە ئۆپەراسیۆنێکی سەربازیی بەرفراوان لە ناوخۆی ئێران کردووە.

سوپای ئیسرائیل رایگەیاند، لە گەورەترین ئۆپەراسیۆنی ئاسمانیدا لە مێژووی هێزی ئاسمانیی وڵاتەکەیدا، کە لە یەک کاتدا و بە بەشداریی 200 فڕۆکەی جەنگی، گورزیان لە 500 ئامانجی ستراتیژی لە رۆژئاوا و ناوەڕاستی ئێران وەشاندووە.

سوپای ئیسرائیل ئاماژەیداوە، ئەمە گەورەترین ئۆپەراسیۆنی ئاسمانییە لە مێژوودا، دوای پلاندانانێکی ورد و بە پشت بەستن بە زانیاریی هەواڵگریی بەهێز جێبەجێ کرا.

ئاژانسی نێودەوڵەتیی وزەی ئەتۆمی دڵنیایی دەدات، کە تا ئێستا هیچ تیشکدانەوەیەکی ئەتۆمی لە ئێران تۆمار نەکراوە، بەڵام پێویستە هێرش و بەئامانجگرتنەکان لە دەوروبەری دامەزراوە ئەتۆمییەکان دوور بخرێنەوە.

ئاژانسەکە رایگەیاندووە، بە وردی و لە نزیکەوە چاودێریی پێشهاتە خێراکانی دۆخی رۆژهەڵاتی ناوەڕاست دەکات.

هەروەها داوای دانبەخۆداگرتن دەکات بۆ ئەوەی هیچ مەترسییەک لەسەر وێستگە ئەتۆمییەکان دروست نەبێت کە ژیانی خەڵکی ناوچەکە بخاتە مەترسییەوە.

عەبدوڵڵا راجحی، گوتەبێژی بەڕێوەبەرایەتیی گشتیی فڕۆکەوانیی شارستانیی کوەیت رایگەیاند: فڕۆکەخانەی نێودەوڵەتیی وڵاتەکەی بە درۆن هێرشی کراوەتە سەر و بە دیاریکراویش بینای ترمیناڵی گەشتیاران (T1)ی کراوەتە ئامانج.

هەروەها رایگەیاندووە، لە ئەنجامی هێرشەکەدا ژمارەیەک لە کارمەندانی فڕۆکەخانەکە بریندار بوون، بەڵام برینەکانیان سەخت نین و ژیانیان لە مەترسی نییە.

عەبدولناسر ئەلحەمیدی، گوتەبێژی وەزارەتی بەرگری ئیمارات دەڵێت "وڵات کەوتووەتە بەر هێرشێکی ئاشکرای مووشەکە بالیستییەکانی ئێران، بەڵام بەرگرییە ئاسمانییەکانمان بە کارامەیییەکی بەرزەوە بەرپەرچی هێرشەکان دەداتەوە."

راشیگەیاندووە، لایەنە پەیوەندیدارەکانی ئیمارات مامەڵەیان لەگەڵ کەوتنەخوارەوەی پاشماوەی مووشەکەکان لە ناوچە نیشتەجێبوونەکانی شاری ئەبوزەبی کردووە، کە بەهۆیەوە زیانی ماددی کەوتووەتەوە و کەسێکیش گیانی لەدەستداوە.

ئیسماعیل بەقایی، گوتەبێژی وەزارەتی دەرەوەی ئێران دەڵێت: بەهۆی هێرشێک بۆ سەر قوتابخانەیەک لە شاری مینابی پارێزگای هۆرمزگان، نزیکەی 150 قوتابی منداڵی کچ شەهید بوون، ئەمەش بە هەموو پێوەرەکان، تاوانی جەنگە.

گوتەبێژی وەزارەتی دەرەوە رەخنەی توندی لە سیاسەتەکانی واشنتن گرت و رایگەیاند: لە قۆناخە جیاوازەکاندا ئەمریکا سەلماندوویەتی کە پابەندی بەڵێنەکانی نییە، ئەمە سێیەمجارە لە 10 ساڵی رابردوودا هەوڵە دیپلۆماسییەکان لەنێو دەبات.