Li Herêma Kurdistanê daxwaza xwendina pirtûkên dîjîtal zêde bûye

Navenda Nûçeyan (K24) – Li Herêma Kurdistanê daxwaza li ser xwendina pirtûkên dîjîtal zêde bûye û medyaya civakî û pirtûkxane bi hev re kar dikin ku xwendevanên nû bibînin vî warî. 

Di van demên dawî de, li Herêma Kurdistanê, daxwaza xwendevanan a li ser xwendina pirtûkên dîjîtal gelekî zêde bûye. Ev meyla nû, medyaya civakî û pirtûkxane neçar kirine ku destê hev bigirin û bi hev re bixebitin, da ku bigihîjin xwendevanên nû û wan han bidin ku zêdetir bixwînin.

Xwendevan Hemed Emîn, di daxuyaniyekê de ji K24ê re eşkere kir, berê wî bi xwe tenê Qur'an li mizgeftê dixwend, lê niha ew bi rihetî li ser telefona xwe ya destan pirtûkan dixwîne. Emîn destnîşan kir, telefonên destan ji bo xwendevanan gelek hêsanî peyda kirine, nemaze ji bo xwendina şiroveyan û şopandina nûçeyên derbarê pirtûkan de.

Li aliyekî din, xwediyê pirtûkxaneyekê Şefîq Mihemed bal kişand ser kêmbûna dema vala ya welatiyan û got, piraniya wan niha pirtûkên ku jê hez dikin bi rêya telefonên xwe yên destan û medyaya civakî dibînin û dixwînin. Ev rêbaz, ji wan re dibe alîkar ku berî kirînê biryarê bidin ka pirtûk hêjayî xwendinê ye, an na.

Hebûna hejmareke mezin a wergêr û nivîskaran nîşan dide ku daxwazeke berdewam ji bo xwendina pirtûkan heye. Rewşenbîr û saziyên çandî jî bi hemû hêza xwe hewl didin ku xwendevan çi bi awayê dîjîtal be, çi jî bi awayê çapkirî, ji xwendinê bêpar nemînin û her tim bigihîjin pirtûkên nû.