PAK: Jiyana Mela Mistafa Barzanî kurteçîroka têkoşîna azadiya Kurdistanê ye

Navenda Nûçeyan (K24) – Partîya Azadîya Kurdistanê (PAK) îro di salvegera 44emîn a koça dawî ya Rêberê Tevgera Azadîxwaza Gelê Kurdistanê Mela Mistefa Barzanî de peyamek belav kir û tê de ragihand, “Rêbaza Mele Mistefa Barzanî, berdewamîya rêbaza doza Şêx Seîd, Xalid Begê Cibrî, Seyid Riza, Îhsan Nurî, Pêşewa Qadî Mihemed e”

Peyama Buroya Çapemenî û Ragehandinê ya PAKê:

Jîyana Mele Mistafa Barzanî, kurte çîroka têkoşîna azadîya Kurdistanê ye

Yek ji rêberên neteweyî yê miletê Kurd Mele Mistefa Barzanî roja 01.03.1979ê koça dawî kir.

Ew aktor û şahîdê gelek rûdanên dîrokî bû.

Ji roja jidayikbûnê heta wafata wî, jiyana Mele Mistafa Barzanî, kurte çîroka têkoşîna neteweyî ya Kurd û Kurdistanê, ya di sedsala 20an de ye.

Mele Mistefa Barzanî, bi rêbaz û xebat û têkoşîna Şêx Abdulselam Barzanî û Şêx Ahmed Barzanî û di medreseya welatperwerîya wan de perwerde bûye.

Rêbaza Mele Mistefa Barzanî, berdewamîya rêbaza doza Şêx Seîd, Xalid Begê Cibrî, Seyid Riza, Îhsan Nurî, Pêşewa Qadî Mihemed e.

Mele Mustafa Barzanî ew alaya ku Pêşewa Qadî Mihemed teslîmî wî kir, tu carî li erdê nexist, teslîmî pêşmergeyên qehreman kir. Bi ked û têkoşîna şehîd û xebatkarên doza azadîya Kurdistanê, ew Alaya Kurdistanê îro li ser Parlamentoya Herêma Kurdistanê li ba dibe.

Ji bo Mele Mistefa Barzanî û ji bo hemû şehîd û kedkarên têkoşîna azadî, rizgarî û serxwebûna Kurdistanê, dê xelata herî mezin, azadî û serxwebûna Kurdistanê be.

Em di 44emîn salvegera wefata wî de, rêberê miletê Kurd Mele Mistefa Barzanî bi giramî bibîrtînin.