شاندێكی پارتی و نوێنهری سهرۆكی رووسیا رهوشی سیاسی ناوچهكه تاوتوێ دهكهن
K24 – ههولێر:
شاندێکی پارتی دیموکراتی کوردستان لەگەڵ نوێنەری ڤلادیمێر پوتین سهرۆكی رووسیا کۆبوونەوە و چەند پرسێکی وەک دۆخی کوردستان، عێراق و ناوچەکەیان تاوتوێکرد.
ئهمڕۆ سێشهممه 30/10/2018 لە باڵهخانەی وەزارەتی دەرەوەی رووسیا، میخایل بەگدانۆڤ ،جێگری وەزیری دەرەوەی رووسیا و نوێنەری تایبەتی ڤلادیمێر پوتین بۆ کارووباری رۆژھەڵاتی ناوەڕاست و باکوری ئەفریقا، لهگهڵ شاندێكی پارتی دیموكراتی كوردستان كۆبووەوە.
لە دوای کۆبوونەوەکە، وشیار سیوەلی، بەرپرسی پەیوەندییەکانی دەرەوەی پاررتی دیموکراتی کوردستان لەبارەی کۆبونەوەکە بە کوردستان24ی راگەیاند: "بەڕێز بەگنادۆڤ دۆستێکی نزیکی گەلی کوردستان و پارتی دیموکراتی کوردستانە ، داوامان لێکرد رووسیا پەرەی زیاتر بدات بە کەرتی ئابووری و سیاسی لە کوردستان".
بەرپرسی پەیوەندییەکانی دەرەوەی پارتی گووتی: "ئێستا دوو کۆمپانیای گەورە رووسی کە رۆزنەفت و گازپرۆمن لە کەرتی نەوت کاری گەورە دەکەن، بەڵام ئێمە داوای پەیوەندی زیاتر و هاوکاری زیاترمان لە بوارە جیاکاندا کردووە".
دەشڵێت: "داوامانکردووە ژمارەی قوتابیانی کورد لە رووسیا زیادبکرێت و سەنتەری بارزانی بکرێتەوە تاکو ببێتە کۆکەرەوەی کوردەکانی رووسیا".
وشیار سیوەلی رەتیدەکاتەوە کە رووسیا سیاسەتی بەرامبەر بە کورد گۆڕیبێت و دەڵێت ئەوان بوار و دەرفەتی زیاتر بۆ بوژاندنەوەی کوردستان دەڕەخسێنن.
H.J